آپاردی سئللر چارانی
حسین رزمی
بو نه بیچیم درمان ایمیش
سینه‌م کول اولدو،کول اولدو.
هر داملا بیر عوممان ایمیش
دوشدو سئل اولدو ،سئل اولدو.
آپاردی سئللر چارامی
هایاندان تاپیم، هارامی؟
یار باغلامادی یارامی
اؤزن لیل اولدو، لیل اولدو.
دانیلدیم قانلى حاق کیمی
سولدان وورولان ساغ کیمی
توتولدوم قاراباق کیمی
بمیم زیل اولدو، زیل اولدو.
بو! یانماغین منه بسدی
بویانماغین صبریم کسدی
آهیم تلسدی، تئل أسدى
دردیم بول اولدو، بول اولدو.
اوره‌ییم اؤلمکده تکدی
اصلیندن کرمه چکدی
اؤزون قصدن اودا چکدی
کولوم گول اولدو،گول اولدو.
۱۳۸۶
