آزادلیق
میرحسینقلی ریاحی‌فر(سید)
کؤرپه‌ده سنی دویور یئر اوزونه گلنده
سنله گؤیلره قالخیر دانیشاندا گولنده
سنین وورغونون اولور بویا باشا یئتنده
سندن ال چکن دئییل جان اولدوقجا بدنده
چاغیراجاقدیر سنی دردینه درمان سنده
قیرمیزی بیر چای کیمی لاله دوزده آخاندا
بولودلارین دالیندان آی مارال تک باخاندا
قارا قیشلار تورپاغین سینه‌سینی یاخاندا
تورپاق آغیر یارانین سانجیسینا دوشنده
چاغیراجاقدیر سنی دردینه درمان سنده
اووچو اوولاری بوسوب اوخ قویاندا کامانا
یاخشی‌لارین گوجلری چاتمایاندا یامانا
یالقوزاق توی توتاندا داغ باتاندا دومانا
یولچو یولون ایتیرسه قارانلیق یول کسنده
چاغیراجاقدیر سنی دردینه درمان سنده
گونش یاسلیلار کیمی الی قولتوق قالاندا
گئجه‌نین اوغرولاری باغا تالان سالاندا
گؤرونمز قفس ایچره قوشدان اوچوش آلاندا
قفسده بولبول آغلار گؤیدن دورنا گئچنده
چاغیراجاقدیر سنی دردینه درمان سنده
شاختانی سیندیرماغا یانیر یاشیل بوداقلار
سندن اؤترو جان وئریر دونیا بویو قوچاقلار
بوی آتاندا اؤلکه‌ده گؤبلک تک یاساقلار
عدالت سئون ایگید ظولم ایله ازیلنده
چاغیراجاقدیر سنی دردینه درمان سنده
قان ایچن قویمایاندا کوتله‌نین اوزو گوله
قورخولار تؤکولنده لال‌لار گلنده دیله
یئر اوزو قیزیل قاندان دؤننده قیزیل گوله
دؤیوشجو گولـله‌لرله تورپاغا سریلنده
چاغیراجاقدیر سنی دردینه درمان سنده
یوردون ایکی گؤزوسن بوتون وار یوخو سنین
گؤزللرین گؤزوسن، لالاسیسان چمنین
قارانلیغا قنیمسن، ایشیق ساچار بدنین
گئجه ده یاشایان ائل قارانلیقدان بئزنده
چاغیراجاقدیر سنی دردینه درمان سنده
سن یاندیران چیراغی سؤندوره بیلمز کولک
بیر گون یئنه گوله‌جک پاییزدا سولان چیچک
«سیّد» سنه سؤز وئریر قالسادا دونیادا تک
سندن ال چکن دئییل جان اولدوقجا بدنده
چاغیراجاقدیر سنی دردینه درمان سنده
