گرایلی‌لار سلسله‌سیندن اوچ شعر
سخاوت عزتی
۱٫ آی آدم اوغلو
قیزیشیب دؤینده گؤزله
دؤشونه سویوق دیمه‌سین!
عاغلینی توپلا باشینا
هوشونا سویوق دیمه‌سین!
بیتمه‌میش فرصت دالبادال،
چیخمامیش الیندن ماجال،
اؤزونه اویغون پاپاق آل
باشینا سویوق دیمه‌سین!
نفسین لایلاسینا یاتما،
خئیر وار، شرّ وار اونوتما!
هر تیکه‌یه آغیز آتما
دیشینه سویوق دیمه‌سین!
آیاغینلا دوز یولا گئت،
یاخشی دانیش، یاخشی ائشیت!
گؤزلرینه یئیه‌لیک ائت
قاشینا سویوق دیمه‌سین!
۲٫ لال سکوت
دونیا تک باشا چکمه
قیرمیزی دون گئیه‌نی!
گؤردون آغزینی ایمه
یوکونو حاقّ ایه‌نی!
دونیا بو نه اورک‌دی،
دمیردن، داشدان برک‌دی؟!
دؤیمک نه‌یه گرک‌دی
کور طالعی دؤیه‌نی؟!
نه مرسل‌دی، نه مجاز،
بو سؤزو بئینینه یاز:
«آلله دا باغیشلاماز
سینیق قلبه دیه‌نی.
اوره‌یی بوغما کین‌له،
تمیز سئوگینی دینله!
اوتاندیر سئومگینله
سنه سؤیوش سؤیه‌نی!
نه گؤی پاتلات، نه یئر از،
سوکوتلا ایچینی گز!
مین فریاد دئیه بیلمز
بیر لال سوکوت دئیه‌نی.
۳٫ گئدیرم
گلدیم گونشلی بیر گونده،
دوماندا، چنده گئدیرم.
ایزیمی گؤرنلر بیلر
نه حالدا، گونده گئدیرم.
گئدن دوستلاریما دئیین
بو قدر یئیین گئتمه‌یین!
سیز آلله منی گؤزله‌یین،
دایانین من ده گئدیرم!
ائه دونیا نه سن اونوتما،
چؤپ اولوب گؤزومه باتما!
قبیردن منی قورخوتما
من اورا گونده گئدیرم!
