بئشینجی باهار
کیان خیاو
سنینله بئشینجی باهار…
بیرینجیسی کیپریکلرین یوموشاجیق لاله‌لیک!
دارانمامیش ساچلاریندان
ائنیرم اؤز ایچیمه.
پنجره‌لری آچیرام
بیرینجی نؤوبه‌ده سنسن
مکتبلی بیر اوشاق کیمی گلیرسن سوچسوز- سوچسوز
گؤزلرین بره‌لیر آنا دیلیمدن.
آدام کیم؟ لیلیت کیم؟ حووا کیم؟
بیرینجی من ترپه‌دیرم سنین سئوگی بئشییینی
اؤنونده گنج ساچلاریمی آغاردا‌راق!…
ایکینجیسی دوداقلارین ایم- ایستی بیر اییده‌لیک!
گؤی اوزونه باخیرام
آغجا یاشیللانیر گونش سالخیملاری
ایکی اولدوز قوش اوزومو د‌ریرم و اؤلورم.
بارماقلاریمین اوجوندان اوچان کپنکلرین
اوچ رنگلی بایراغی اولور لئچه‌یین.
بیرلیکده ائش، یاخین، قارشیت، بیر آنلام جان اولوروق
گؤوده‌میزی اؤپوش- اؤپوش اینجه‌له‌ییریک.
او غایه آنلامسان یعنی
اونوتمایاجاغیم کئچمیش
واز کئچه بیلمه‌یه‌جه‌ییم گله‌جه‌ییم
آنام، سئوگیلیم، اویناشیم، هر نه‌ییم!…
اوچونجوسو گؤزلرین دونیانی ایچیندن گؤسته‌رن فوتوغراف!
گؤی اوزونون اوچونجو قاتینداییق
بیر دنیز اولدوز ایچینده
داها دا گؤرونتولودور یالنیزلیغیمیز
و یالنیزلیق هئچ بیتمه‌یه‌جک سانیلان بیر اؤیکونون
اوچونجو سطیرده بیردن بیتمه‌سیدیر سونسوز، سونوجسوز.
سئومک، سئویشمک اوچون
اؤلومدن باشقاسی یوخ
اؤلوم بنؤوشه چالیر ساچلاریندا
اؤلوم ایری- ایری باخیر گؤزه‌للیییمیزه!…
دؤردونجوسو اللرین اله‌نن آلما باغلاری!
بیر ایستاتوسدان باشقا بیر ایستاتوسا کئچیرم
بؤیوک ایشکنجه‌دیر اوخول، ائو، خیابان، شئعیر
شئعیردن کومونیزمه دؤرد آددیم یول وار
دؤرد ایل بؤیوکدور شئعیردن کومونیزم.
نه دئکارتین قاورامسال فلسفه‌سی
نه هولدئرلینین تراژیک اوسچولوغو؛
اصل اولان بیر آرخایین سسدیر دویغولارین آخاری
دونیا ایلک اؤنجه بو سسدن یاراندی دؤرد گونده
سونرا سئوگی، سونرا نیفرت آتیلدی اورتامیزا
داها سونرا بیرگه گؤزوموزدن یاغدی
نیچه‌نین ان بؤیوک کشفی نئهیلیزم!…
بئشینجی باهار بئشینجی مؤوسومون باشلانغیجی
زامان یوخ، مکان یوخ
یارانیش
تانریلارین تکباشینا تئرور سالدیریسی.
آغاج یوخ، چیچک یوخ، اود یوخ، اینسان یوخ
سئوگی او قدر آنلامسیز
داها آنلامسیزلیغین دا یاشاملا ایلگیسی یوخ
اؤلوم سیسقاجیق بیر قیز
اؤلوم یئتگین بیر قادین
قیزین اللرینده، گؤزلرینده تئرور
قادینین بارماقلاریندا، دوداقلاریندا تئرور
و تئرور اینسان اؤلومونو گؤزه‌للشدیریر!…
سنینله بئشینجی باهار
باهار دوپ- دولو بیر بوشلوق مؤوسومودور سنسیز
آغاجلاردان مئشه‌لری سیلیرلر
اولدوزلاردان گؤیلری سوپورورلر
سنی مندن آلیب، چالیب گؤتورورلر.
و من یئنه دارانمامیش ساچلاریندان
ائنیرم اؤز ایچیمه!…
۱۳۹۶/ ۱/ ۱
