یامان ماشاللاه بول اولوب
اوستاد- معللیم بازاری.
تئز- تئز اوزرلیک سالیرام
گؤزو چیخسین بدنظری.
داش دیبیندن دوختور چیخیر
گؤیدن موهندیس اله‌نیر.
بئکار بئدین دنه چیرتلیر
گوشی الینده سوله‌نیر.
چاغیراندا آغا دوختور
دؤنور باخیر حامبال متیش.
دونن ناخیرچی کتدیده
بوگون اولوب رئیس یدیش.
آللاها بنده دئییلی
بیزیم قونشو کالبای خودوش.
دئییر غلط ائلیر اولا
خودوشا تای؛ جناب بوش.
ذوقا گلیب طؤوله‌ده‌ده
گؤیه گئدیر بیزیم گامیش.
مدرک ساتیرلار دئییرلر
من ده بیرین آلمالییام.
ددم روحو، ننه‌م گورو
من ده دوختور اولمالییام.
خیلاصه هرکی هرکی‌دیر
یئردن- گؤیدن دوختور یاغیر.
هره نجور کی ایسته‌ییر
بو شؤهرتین سوتون ساغیر.
بوردا منم بغداددا بیر-
کور خلیفه دئییر باقیر.
«افروز» دئییر: کس؛ اؤزومم
لال اول قارشیمدا آی صاغیر!
