نادرین قلمی شعیر یازاندا
سخاوت عزتی(عندلیب)
سویوق طبیعتین دگیشیب بئله
پاییز شاعر اولور، قیش شاعر اولور،
بیر اوره‌یی یوخا گؤزه‌له دؤنوب
قایا شاعر اولور، داش شاعر اولور،
آغاجدان آغاجا غزل گزدیریب
ماهنی دئیه – دئیه قوش شاعر اولور،
نادرین قلمی شعیر یازاندا.
غزل رقص ائله‌ییر گؤزه‌للیگیندن،
قوشما هئجا – هئجا یوز شرف تاپیر،
محبت داستانی دئییر گرایلی،
اوغلان قوچاقلانیر، قیز شرف تاپیر،
چاتیر سون حدینه دویغو، دوشونجه،
سؤز قیمت گؤتورور، سؤز شرف تاپیر،
نادرین قلمی شعیر یازاندا.
وئریب لئچگینی اسن یئللره،
لاله یاللی گئدیر خیاو دوزونده،
بولاقلار شیرهاشیر موغام سؤیله‌ییر،
یارپیز مورگوله‌ییر سویون اوزونده،
تؤکور گؤز یاشینی داغ بولوتلاری،
داغدا داغلیغینی تاپیر اؤزونده،
نادرین قلمی شعیر یازاندا.
بیر دوه قاطاری او یالدان آشیر،
بیر ائلین کؤچودور بو یالدان گئدیر،
عاشیقلار باشلاییر اوبا تویلارین،
گؤر هانسی دونیالار خیالدان گئدیر،
تئللی ساز دانیشیر، قوشما دیللنیر،
صحبت ائلدن گئدیر، ماحالدان گئدیر،
نادرین قلمی شعیر یازاندا.
«عندلیب» سینه‌سین آچیر ساوالان،
دئدیگی مین دستان، مین صؤحبت اولور،
دانیشیر باشیندان اؤتوشنلری،
بیر ائلین تاریخی روایت اولور،
منیم سلطان بابام، ساوالان بابام،
تپه‌دن دیرناغا شعریت اولور،
نادرین قلمی شعیر یازاندا.
