…دایام
امین خداوردی

ایندی هر شئیی سووشاندایام
گئجه گوندوزه جالاناندا
دان یاریلاندایام.
عاقیل دیشینین سانجیسی بئینیمده
گؤزلریم یوخونا گیره‌جک کیمی یومولور
ساعاتا باخیرام
تام
نه بیر آن اویان
نه بویان
تاریخین ان مشهور یئرینده
چکیشمدن قورتارمادایام.

یاز یاغیشی آسیلیب گؤیدن
– آسما کؤرپولر کیمی –
اییلیب آلتیندان کئچیرم
گولورم اوزونه
– آلدانما! من داها چتیرلی چیخیرام یاغیش آلتینا!
چتیریمه آلیرام سنی
یاغیش کسیلندیم.
– من یاغیشدان سونرا جانلانان شهریده سئویرم خانیم
من سیزدن سونرا چوخلارینیدا سئویرم
من اؤزوموده سئویرم خانیم.

سنی گؤرنده
– شیرین سانجی دوغولور قارنیمدا
بیرازدا اللریم داریخیر سنه-دیم
دوروب ائویمیزه گئدیم
کوچه‌نین اورتا زولاغینی کئچیرم
– سنی ان گؤزلینده ساخلاماق
شیرینین ان سانجیسیندایام –

توخونموش سیمین سسی
اوچوب چیرپیرلدی بالدیریما
اوغولتوسو ائله یاندیردی آریق قیچلاریمی
گؤزلریم قیزیشدی
ایکی یاش داملاسی اینشامی اوزدوردو بالیق کیمی…
اوچورام
قیرمیزی شالواریمین یان طرفینده آغ زولاقلاردا
کتان باشماقلارین برکیمیش باغیندا
پلاستیک توپون شییرین یاندیرماسیندایام…

آرخاما دؤنورم
اؤنومه گئدیرم
ساعت تام
دوشمک ایستمیرم تام دوراقلاردا
دنیز کولیینده چالخالانماقدایام قاغایی کیمی