یئنه‌ده آذرلر گؤیه‌رجک!
سعید قافلان
آنا وطنیم آذربایجان!
یئنه آذرلر گؤیه‌رجکسن-
گوللو، چیچکلی؛
آذرلر گؤیه‌رجکسن-
پاک، صاف اوره‌کلی؛
آذرلر گؤیه‌رجکسن-
یایلی، باهارلی؛
آذرلر گؤیه‌رجکسن-
آیدین، دورو سو آخارلی…
دؤیدولر
آسدی‌لار
کسدی‌لر
اؤلدوردولر،
آمما، اؤلمه‌دی دیریلیگیمیز،
مردلیگیمیز،
بیرلیگیمیز!
آنا وطنیم آذربایجان!
یئنه آییق‌دیر-
مرد اوغول‌لارین، قیزلارین؛
آل شفق‌له بورونه‌جک یاماجلارین، داغلارین؛
باغچاندا
باردان اییله‌جک بوداقلارین.
بودورکی
گؤیده گونش،
تورپاق اوزه‌رینده چیچک گوله‌جک؛
یئنی‌دن بیرلیک سسی دیرچه‌لجک.
سؤیله‌نجک بو نغمه دیللرده اینان:
سنسن بیزه گوزل وطن
آذربایجان! آذربایجان!
