«اوستاد هریسی» (موسی هریسی‌نژاد) حیاتلا ابدی‌لیک وداعلاشدی
الیمیزه چاتان خبر اساسیندا، آذربایجان کلاسیک شعری‌نین دوامچیلاریندان اولان اجتماعی شخصیت، شاعر و تدقیقاتچی حاج موسی هریسی‌نژاد «هریسی» بوگون خرداد آیی‌نین ۲۳ی یاشادیغی تبریز شهرینده ۹۲ یاشیندایکن حیاتلا وداعلاشمیشدیر. اوستاد هریسی تانینمیش شاعر جناب «هریزلی»نین آتاسی‌دیر.
«ایشیق» – آذربایجان ادبیات و اینجه صنعت سایتی امکداشلاری بو ایتگینی آذربایجان ادبی اجتماعیاتینا، حؤرمتلی «هریسی‌نژاد» عائیله‌سینه و امکداشیمیز «هریزلی» جنابلارینا باش ساغلیغی وئریر و مرحومون خاطیره‌سینی عزیزله‌ییریک.
«اوستاد هریسی»نین ایتگیسی‌ایله باغلی مراسیملر:
تورپاغا تاپشیرما مراسیمی:
سه‌شنبه گونو ۲۵ خرداد
تبریز- وادی‌رحمت مزارلیغی- ساعت ۱۱
شام غریبان مراسیمی:
سه‌شنبه گونو ۲۵ خرداد
مسجد سالار- ساعت ۱۹_۱۷
خاطیره مراسیمی:
پنج‌شنبه گونو ۲۷ خرداد
مسجد طوبی- ساعت ۱۷:۳۰_۱۹:۳۰
وئرمه‌رم سنی/ موسی هریسی
آفاقی گر بها وئره لر، وئرمه‌رم سنی
“موسی” سانیب،عصا وئره‌لر، وئرمه‌رم سنی
اولدوزلاری، یئری، فلکی، کهکشانلاری-
بی چون و بی چرا وئره‌لر، وئرمه‌رم سنی
دیلدن دوشوب،بوغاز قوووشوب،جان وئره‌ن زامان
نوح عؤمروجه بقا وئره‌لر، وئرمه‌رم سنی
دنیا ریاستین کی چکیر آرزیسین هامی،
شرقیله،غرب آرا، وئره‌لر ، وئرمه‌رم سنی
سندن سورا هامی اگر عیسی نفس اولا-
بیمار اولام شفا وئره‌لر، وئرمه‌رم سنی
کشف شهود،سیر سلوکیمده یول نشان،
با علم کیمیا وئره‌لر وئرمه‌رم سنی
یورغون”هریسی”نین تالانان شن باهارینا
گر تازه‌دن صفا وئره‌لر، وئرمه‌رم سنی
یک پاسخ
اوستادین محترم عائله سینه وعزیز قلمداشلارینا ونهایت آذربایجانا باشیز ساغ اولسون دئیب آرزی ایدیرم آذربایجانیم داهابیله آغیرایتگیه معروض قالماسین