منی گؤزوندن ایراق سالما!
رضوان جانای

سسیم سسینله قاریشدی سپیلدی قار سایاغی
یازیم یاییلدی یازیندا سیزیلتی آلدی باغی
دووار گؤزونده شعیرسیز قالیبدی قاپ- باجامیز
منی قوجاقلایار ایندی سازاقلی غم دوراغی
دوداق- دوداق سوساجاقدیر ایچیمده آرزیلاریم
یانیب یانیب کؤزه‌ررکن دوشونجه‌مین چیراغی
باهار چاغیندا زامانسیز گؤیرمه‌دن سولاجاق
خاطیرلایاندا منی لال بنؤوشه‌نین یاناغی
قیزیل گولون دوداغیندا قانادلانیر کپنک
گؤزونده دالغالی حسرت اوره‌کده آغری داغی
سینیبدی دفتریمین اوسته بیر یانیقلی اوره‌ک
یانیب کول اولمادادیر سانکی شعریمین دوداغی
منی گؤزوندن ایراق سالما یالواریم‌می سنه؟
آماندیر اوندا گؤزومده سینار گولون بوداغی