هانسی دووارلارا یازیرسان یاز
واهاب حاجی‌زاده

هانسی دووارلارا یازیرسان یاز
آیریلیق اؤگئی‌دیر
ایستر سنله منیم آرامدا
ایستر منله هرکس آراسیندا
ایستر لاپ بئله اؤز آرامدا
گؤی اوزونون هانسی قاتینا قاتلانیب یالوارمالیسانسا یالوار
آیریلیق بیر قوشدور
یاری قارقا
یاری بایقوشدور
آماندی چرچیوه‌لری اؤزگور بوراخ
ایراااق بو قوشدان
بورا بیر قوش قوندو
بیری گؤردو
بیری شئعرلرینین خئییر شرینه قاتدی
بیری بسته‌له‌ییب نوتا باغلادی
بیری سسینه دویونله‌دی
آما..
مین بیری یاندی
مین بیری اوخودو
یاندی اوخودو
اوخودو یاندی
یاندی اخودو
یاندی-قیندی اوخودو
یاندی اوخودو
قیندی اوخودو
قین‌دی اوخودو
آیریلیق بیر قوشدور
یاری قارقا…
یاری بایقوشدو
آماندی چرچیوه‌لری اؤزگور بوراخ
ایراااق بوقوشدان