دونیادان پاییم
معصوم جبارپور
سنینله_
من
بیرده دیواردا ساللانان هؤرومجکلر_
ال اله وئره‌ک
یاشلاریمیزی سوزه‌ک
نئچه یوزلو یارپاقلی
آجی بیر بیتیکه
***
دونیادان پاییم
بیر اتک حسرت ایدی
بیر ده قایغیلار
دئمیشدیم جیغال تانریدیر منی یارادان
هاچانسا
بیلمهدیم!
سئوینجلریمین ایپینی قیردی بیریسی
حسرتلر داغیلدی دلیک اورهیه
دوداقلار گولومسهمهیه حسرت قالدیلار
گؤرهسن بیر گون اولاجاقمی
قهقهه سسی اوتاغا داغیلسین
قاریشسین گولوشلرین بیر ـ بیرینه
اورهییم چیرپینسین گولوشلرین چیرپینتیلاری ایله
گؤرهسن بیر گون اولاجاقمی
منجیل گونش قیزی باتیدان دوغولسون
یابانجی سؤزلر آیاق توتوب یئریسه ده
جان وئریب اؤلسون
گؤره سن بیر گون اولاجاقمی
گؤیدن گلن ماهنیلار اوخونسون یئر اوزونده
سونرا اوزون دره‌لره یاییلسین
رقص ائتسین شهرین قیزلاری
بویو ـ بویوندان اوزون چیچکلرایله.
یئنه ساییقلاییر قیز
قارغالار آغ گئییر
گئجه‌لر ایشیق ساچیر
کابوس‌لاری قوووبلار یوخولاریمدان
دیک آتیلا بیلمیرم
داها
یوخودان شهرین یاشیل گؤزلرینه!
یئنه ده
کابوسلار یوکله‌نیر
گمیلریم یئنه ده باتیر آرزولار دنیزینده
گئجهنین اورهیی دولوب آجیلارلا
ایچیرم ۳۰ ایللیک آجی شرابیمی
من نه قدر آجیلاشمیشام
منه بیر مزه وئر
نه اولار
***
بیر گئجه
بیر کیشی
قیرقین باغلاری
اوتورتدو
هؤردو
هانسی ائلدن ایدی؟!؟
تانیمادیم هئچ
تامارزی قالدیم اللرینه
اللرین بوینوما ساریلاندا
گوجوم ایکی قات آرتیر
گئجه ایدی
گلدین اوزاقدان
تاپولو اوره‌گین ایله ساریلدین منه
اوزاقدان بوز کسمیش اورهیه_
آلوو جالاندی
تیکانلی تئللر قیریلدی
ساریلدی ایکی تایین آیریلیقلاری
اوچدو هاوادا زینجیر چیچه‌یی
خبرلر یاییلدی شهرده
کوچه‌لر بَزندی
سئوگی سسیله.
بو گئجه یئنیدن
دویغولار هؤووشنه امیر قایغی‌لی ممه‌لردن
ایچیمه باتیر آغیر قایغیلار
گل
سنینله_
من
بیرده دیواردا ساللانان هؤرومجکلر_
ال اله وئره‌ک
یاشلاریمیزی سوزه‌ک
نئچه یوزلو یارپاقلی
آجی بیر بیتیکه
بیلیرسن می؟
بیر گون
بیتیک ائویندن
اوخشاما سسی یاییلاجاق شهرین
دلیک دئشییینه…
***
بو گئجه قاپی دؤیولسه ایسه
تبریز یاتاجاق
تبریزده اووونمایان قیز
سنین گؤزلرینه
باخیب
اوووناجاق…
تبریز مورگوله‌نیر …
