فریدون حاصارلی‌نین یاسیندا
میرحسینقلی ریاحی فر(سیّد)

بو اودلار یوردونون قاداسین آلیم
قوینوندا بسله‌ییر ایگید اینسانلار.
گونشلی تورپاغین قایغی‌سین چکن
یاشامیندا دوغما ائله یانانلار.

اردملی، ساییلان شیرین سؤزلولر،
شاختا قاباغیندا سؤنمز کؤزلولر،
ایگیدلر یاسیندا آغلار گؤزلولر،
«حاصارلی» دوستوم تک درین قانانلار.

یانا ـ یانا الدن وئردیک دیلداشی،
آغلار قالدی بوتون قوهوم ـ قارداشی،
«حاصالی»نی تانیر یولو  ـ یولداشی،
اونو سارسیتمادی قیشلار ـ بورانلار.

بوگون یاسا باتدی دوغما دیلیمیز،
یاناقدا یئر سالار قیزیل سئلیمیز،
«سیّد»، یاشایاجاق بیزیم ائلیمیز،
قوینوندا بسله‌ییر ایگید اینسانلار.