ای مقدس مسکنیم، ای شانلی آذربایجان!
بیز سنینله فخر قیللیق یئر اوزونده هر زامان.
قوی وار اولسون ای وطن، اصلان صفت اوغلانلارین!
اؤپسون آلنیندان آنا! اونلار سنین، سن اونلارین.
***

ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!

شام و سحر ال‌لشیب فعله، یازیق کارگر
اوستو جیریق قارنی آج دائم اولوب خون جیگر
آلدیغی اوجرتلرین بیر شاهیسی وار مگر؟
سینه‌سینه مؤحنتین داشلاری هر آن ده‌یر
ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!

بیر ائو آدام ایشله‌ییر هاردا گورور بهره‌سین؟
ار گئدیر حامباللیغا آرواد آییر جهره‌سین
دؤرد- بئش اوشاق هر بیری چالخالیر اؤز نهره‌سین
بونلا بئله شرمی وار آچماغا بوش سوفره‌سین
ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!

خیردا اوشاق گؤز آچیب فوری گئدیب ایلمه‌یه
مدرسه یوخ، درس یوخ، محروم اولوب بیلمه‌یه
دائم آخان گؤز یاشین، دستمالی یوخ سیلمه‌یه
یوخسولون ائولادیدیر محکوم اولوب اؤلمه‌یه
ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!

یوخسولا ائو اولسا بیر دخمه‌دی ایچ قاپ – قاره
دام – دوواری شئه – شیکست نه قاپی نه پنجره
سانکی یاتیب چول – پالاز بورگه‌لنیبدی هره
ائو دئمک اولماز بورا بلکه ییخیق مقبره
ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!

لاپ گتیریر انسانی بیر پارا ایش جانه ها!
عقلی باشیندان چیخیر ائیله‌ییر دیوانه ها!
چکسین اؤزو حق گؤروم ظالیمی دیوانه ها!
دؤندو بو مظلوملارین گؤز یاشی عمانه ها!
ائل هامی جانسیز‌‌دیلار آی قارا قیش گلمه گئت!
تاب و توانسیز‌‌دیلار آی قارا قیش گلمه گئت!.