“چاپارا ”
م.فخری
اوزاق ایللر
قیشین آستاناسیندا گؤروشدوک
باغری سؤکولموش نارلارین اؤنونده…
اوزون یوللاردان گلیردیک:
منیم اللریمده سو
سنین اوره‌یینده اود،
تاریخ و زامان کیمی.
بیز اینسانا اینانمیشدیق…
تالانمیش ائل لردن
کوکره‌ین سئل‌لردن کئچیب ،
جفته‌لی قاپی‌لارین آرخاسیندا دایانمیشدیق،
آلاتورانلیقدا .
یاراسالار
هاوادا اویناییردی
اوجالیردی یایلیم سسی.
قارا – قورخودان گیزله‌نیردیک،
گؤزو آچیق یاتیردیق
ایللر بویو…
سوکوت مین بیر دیلده دانیشیردی
کلمه‌لر
سیزی ،
حسرت داشییردی…
بولاشیجی و آغیر ایل‌لردن سونرا :
منیم اللریم دونموشدو
سنین
سؤنموشدو اوره‌یین…
من بیر قورخولوق کیمی دایانمیشدیم
اوموزلاریما
بالاجا قوشلار قونا – قونا.
و سن بیر شام کیمی
آغ ائتمیشدین
شاختا بابا
قیش بابانین اوزونو ،
اوره‌یین یانا- یانا .
