دیرچه‌لیش
حسن ایلدیریم
یاواش – یاواش
پاییزلاشیرام،
ایچیمده
اسکی ایستکلرین، قوروموش آرزولارین
یارپاق تؤکومو باشلانیر،
دامارلاریمدا
پاییزیمیش سولار کیمی سوزالیر قان،
گؤزلریمده
آوازییر، بوزاریر زامان،
جانیمدا ساریلمیش پاییز کولک‌لری کوشولداییر،
باشیمدا بولوتلار چاخناشیر؛
بودور هئی …
قیشیم یاخینلاشیر!
پاییزلار بوزلوغونو، ساریلیغینی سویونوب
قیش یوخوسونا جومان کیمی،
من ده
جانیمین قارتیمیش حسرتلرینی
اوره‌ییمین کوتلمیش گؤینک‌لرینی سویونوب
عؤمرومون سیرلی یوخوسونا جوماجاغام؛
یوخولاریمدا:
سئودا شفقلی سحر سولاری آخاجاق،
رؤیالاریما
سود قوخوسو، یاغیش قوخوسو ساچیلاجاق،
دینجه‌لیب، دیرچه‌له‌جه‌یم؛
اوره‌ییمده
گیزلی باهارین آیاق سس‌لری گله‌جک،
اومیدلریم پؤهره‌لنه‌جک
ایستک‌لریم چیچک‌لنه‌جک،
باهار ایشیغینا بورونه‌جه‌یم؛
اوفوقلر، اوفوقلر
دان یئلی‌له تومارلانان اوفوقلر
آچیلاجاق؛
اویاناجاغام
کؤنلومده یاشاییب، یاراتماق آرزوسو،
گؤزلریمده
قارانقوش‌لار سسله‌جک
دوداقلاریمدا
بنؤشه‌لر، نرگیزلر گؤیره‌جک؛
ال‌لریم
تزه جؤره‌ک عطری ساچاجاق،
ایاق‌لاریمدا
یوللار چیرپیناجاق؛
باهارلانمیش عؤمروم
عؤمورلره
ایل‌لره جالاناجاق
تهران- قیش ۱۳۷۵
