شعرلر
سارا آستارالی

(۱)
سن گئدرکن
سو سپمه‌دیم آرخانجا؛
گئتدیییندن بری
هر گئجه
سو اولوب سپیلیرم یوللارا؛
هر گئجه
خاطیره‌لرین کؤلگه‌سینده باتان گؤنشه لای‌لای اوخویورام,
و گؤزلریمده بوز دؤوری باشلاماقدا,
شاختا کسیر داماریمی؛
آرتیق گئچمه‌لی اولسام دا،
بوزلو یوللاردان دئییل
سندن گئچمه‌لییم.

(۲)
تاپشیرمیشام یئللره,
گئدرکن منی‌ده آپارسین،
اوزاقلارا گؤتؤرسون،
گؤزلردن ایراق
هامیدان اوزاق.
آرخامدان آغلایاجاق ساعاتلار،
دیسکینه‌جک اولدوزلار؛
من گئدنده صاباحلار ساللاناجاق،
گئجه‌لر چؤکه‌جک،
چونکی یئر اؤزو قلبیمی تیترتدی.
ایچیم یانار داغی,
دوداغیمدان داشلانان تبسسوم ایله گئده‌جه‌یم.

(۳)
ایکی قورشون پاتلاتدیم
اؤنجه سنین
سونرادا اؤز بئینیمه.
اؤلدوردوم…
بیز اؤلدو…
حؤکمومه راضییام…
محکوم اولدوم عؤمور بویو سنسیزلییه.