کؤرپو
فاطمه زلفی
کؤرپوده،
بیر گونوزون باشلانیشیندا
یولا گؤز قویموشدوم
گئد – گلین سسلرینی
یولدا دوشن کؤلگه‌لری
شؤوق ایله، ایزلیردی اوره‌ک
بیر قوجا الده چلیک
آخسار- آخسار، سورونوردو بریه
آپاریردی بیر کیشی ائولرینه
ایستی چؤرک
بیر قادین الده سله
بیر اوشاق آتین چاپیردی کؤرپوده
بیر اوجا بویلو جاوان، ” سن”
منیله اوز- اوزه گلدیک او زامان
سن سولا
من ساغا گئتدیک ایره‌لی
کؤرپوده
بیر گونوزون باشلانیشیدی یئنی‌دن
گئد- گلین سسلرینی
یولدا دوشن کؤلگه‌لری
شؤوق ایله، ایزلیردی اوره‌ک
بیر قوجا
بیر اوشاق
بیر شله‌لی، شسلی جاوان
بیرده من، الده سله
دئیه سن،
“کؤرپو” ده، “گؤی” ده، “هاوا” دا،”من” ده
سنین کؤرپوده ایتمیش آیاقین سسلری ده
بیرده، بیر آنلیق، یاشادیق
ندن اولدو گؤرسن؟
بیر دایانیب دینله‌می‌یی
بیلمه دین هئچ؟
سولا باخدیم
ساغا گئتدیم ایره‌لی
سن یوخودون.
۸۸٫۱٫۸
