عؤمور یوللاری
جعفر تانیش

عؤمرومون دومانلی کوچه‌لرینده
آراییب چاتمایان ایسته‌ییم نه‌دیر؟
اؤزومون ایچیمده تاپماغیم گره‌ک
گونلری آییرماق بیر بهانه‌دیر!

اوراغیم زمی تک گون‌لری بیچیر
باغلانیر تایلاری هئی بیر ایل، بیر ایل.
اوره‌ییم صاباحا بئله تله‌سیر
ائله بیل بو گونوم عؤموردن دئییل.

بو گون کی دوننه صاباح گونی‌میش
گئجه‌نین الی‌له اونو قویلورام.
اوولارا آجیخمیش بیر جاناوار تک
صاباحی یئمه‌یه یئنه اولورام.

صاباحی بو گونه یامان دئیرکن
یامانا یئتمه‌یه تلسمم آرتیر.
سحرلر آخشاملار ده‌ییرمان سایاق
عؤمرومون دنینی اؤزونده دارتیر.

عؤمرومون دومانلی کوچه‌لرینده
آراییب چاتمایان ایسته‌ییم نه‌دیر.
اؤزومون ایچیمده تاپماقیم گره‌ک
گونلری آییرماق بیر بهانه‌دیر!