اونوتما
حسین ریاحی‌فر
شاختا اونودوبدور یازین گلیشین
شاختادا چیچه‌یی، باغی اونوتما!
هر نه‌یی اونوتسان ساخلا یادیندا
کؤکسونده‌کی چارپاز داغی اونوتما!
سینه‌سی گول آچان گئدن یولداشین
گئدر گلمز اولان دوغما قارداشین
دیل اوچون تاپدانان اَرن دیلداشین
آنالار آغلایان چاغی اونوتما!
تیتره‌مه‌سین یامان گونده آیاغین
اود آچسین ظالیمه دلی یاراغین
قارانلیغا قارشی دورسون اوجاغین
کوراوغلونو چنلی داغی اونوتما!
«سیّد»م اؤلونجه وارام سؤزومده
وولکان شیمشکلری یاشار گؤزومده
گل قیش گونو قیزین منیم کؤزومده
شاختادا چیچه‌یی باغی اونوتما!
یک پاسخ
Görkəmli şayirimiz Mirhüsen Riyahifər(Seid) ! Şeriniz olduqca gözəl və anlamlıdır ! Yaşıyasınız siz və hörmətli ışıq saytının əməkdaşları!