قایا دوستلاریم
ائل اوغلو
(علیرضا میانالی اوچون)
دونن قافلانتی دان اؤتوب گلیردیم،
بیر قایا سالینا گؤزوم ساتاشدی.
اؤزو بیر داغ ایدی گؤزومده منیم،
او قایا نه قده‌ر منه تانیشدی؟
یوز دوستا اوخشاتدیم اونو بیر آندا،
ائله بیل یوز دوستوم داغدان انیردی.
سانکی دوستلاریمین چکدیگی نفس
چوپور قایالاردا کؤلگله‌نیردی.
معنالی بیر گولوش دوداقلاریندا،
گؤزلری یوللارا تیکیلن قایا.
یئنه گؤزلرینده صاباحا اومود،
ائله بیل سن ایدین او گولن قایا.
اوخشاتماق ایسته‌دیم یولداشلاریما،
نئچه دوست گؤیلومده سس- سسه وئردی.
او قده‌ر او، منم، بو، منم دئدی،
آه، قایا دوستلاریم گیلئیله‌نیردی.
من دئیه بیلمه‌دیم بو دئییل، اودو،
گلمه‌دی فیکریمده سایا دوستلاریم.
سیلدیریم کیمی‌دیر، اؤز سرتلیگینده ،
هله ده یئنیلمز قایا دوستلاریم.
3 پاسخ
ایستکلی سورگون دوستوم سلام و سایقیلاردان سونرا ، لطفونوزدن ممنونام . چوخ ساغ اولون . آمما ایجازه وئرین مئساژنیزا قاییتدیقدا؛ اوزون ایللر بوندان قاباق یازدیغیم بیر شعیریمله موناسیبتیمی بیلدیرمیش اولوم.( ائل اوغلو ۴-۱۰-۹۳
اوزاق اولسام
من ائلهام قانادلی آغ‌گؤیرچینم،
اوچارام گؤیلرده شن آرزیلارتک.
سیز ای گؤیرچینلر، اوچاق گلسه‌نم،
وطن گؤیلرینی آغ گئیندیره‌ک.
گئینسین اگنینه اوفق‌لر بیزی،
چیرپینسین گؤیلرین آغ اوره‌کلری.
چیله‌نسین دونیایا قانادیمیزدان،
حیات نغمه‌لری، نور له‌لک‌لری.
یوخ، منی اوزاغا آپارما ائلهام،
تورپاغا باغلیام، تورپاق یئریمدیر.
منی سئونلردن چوخ اوزاق اولسام،
لاپ آیاق آلتلاری اوزاق یئریمدیر.. ( ائل اوغلو –۱۳۶۸ )–// قوشمالار کیتابی//چاپ : ۱۳۸۱)
عزیز دوستوم ائل اوغلو جنابلاری، اؤزونوز ده سرت و هوندور بیر قایا سینیز.
هه. اوره‌یینه ساغلیق اوستاد
گؤزه‌ل ایدی……