سنسیزلیک‌لر(۵)
مجتبی نهانی

 (۱)
دئمه آیام
یانیرام-
گونش اولمادیغی زامان.

(۲)
یاغیشسیز زامانلاری
بیر کیشی چتیر آچیر
و بیر قادین-
آغلاییر.

(۳)
یاشاماق، گؤزلرینده‌دیر
ایستیرم هئی منه باخاسان.

(۴)
بارماقلاریم-
سنی سسله‌ییرلر
کئشکه بیر آز توخونسان منه
هئچ گئتمه سن.

(۵)
سنسیزلیییه یازیلمیش
بیر کاغیذا بنزر-
منیم حیاتیم
هئچ بیر شئی دئمه
اوزاقدان دا اولسا-
سنه باخماقدان یورولمارام.

(۶)
قلبیمه یاخین سؤزلر دئه
ایچیمده اَسن یئل‌لر-
تانیش دئییل‌لر.

(۷)
سورقون دوشر جانیما
یانار سؤزلر-
ایز بوراخار
گؤوده‌م بؤیوک یوخلوق‌لار داشییار.

(۸)
دوشوندوم-
سن اولسان
یالنیزلیک نئیلر؟
اودا یازیق‌دی-
بیزسیز داریخار.

(۹)
سسین اوزانیر یانیمدا
قولاغیم یوخو گؤرور
نه گؤزل دانیشیرسان-
یاشامدان، دونیادان.

(۱۰)
دونیا قده‌ر یوخلوق بوراخدین منه
بو بوشلوقلاری-
یاغیش دا دولدورمایاجاق.