بیله- بیله
هریزلی
“ائلدار موغانلی”نین “هله بیلمیرم” شعریندن استقبال
بو سئودایا دوشدوک قوشا-
سن‌ده، من‌ده بیله-بیله.
بو سئودایلا دولدوق یاشا-
سن‌ده، من‌ده بیله-بیله.
سوروشما بو سئودا نه‌دی!
سئودانی اوره‌ک ایسته‌دی؛
دوشدوک بیر عشقه ابدی
سن‌ده، من‌ده بیله-بیله.
عؤمور اؤتور آغاریر باش،
سئوگی آرتیر آرتیقجا یاش،
دؤننمه‌ریک یولدان یولداش-
سن‌ده، من‌ده بیله-بیله.
اوچوش اولسان قانادینام،
سئوگی اولسان اینادینام،
دئدیک بو دونیایا قادام-
سن‌ده، من‌ده بیله-بیله.
اؤلچولرین ده‌ییشمه‌سی-
یولو ائده‌نمر ترسه‌سی؛
ائشیدیریک گل- گل سسی-
سن‌ده، من‌ده بیله-بیله.
مهر ۱۳۹۳-هریس
