ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4

olya
ادبیاتیمیزین بیر بوداغی‌دا قیریلدی: اوستاد “علیایی” ابدیته قوووشدو.

چوخ تاسوفله, تانینمیش آذربایجان ادبیات خادیمی, آذربایجان یازیچیلار بیرلیگی‌نین فخری عضوی و ساهر ادبی- مدنی درنه‌یی‌نین آق‌ساققالی قوجامان شاعریمیز اوستاد “آقازاده علیایی” شهریور آیی‌نین بیرینده آرامیزدان کؤچدو. کرج شهرینده یاشایان و تهرانین مسیح دانشوری خسته‌خاناسیندا ابدیته قوووشان اوستاد علیایی شنبه گونو عائله‌سی, دوستلاری و تهراندا یاشایان بیر تعداد آذربایجان شاعر و یازیچیلاری‌نین مشایعتی ایله بهشت زهرا مزارلیغیندا تورپاغا تاپشیریلدی.

 اوستاد آقازاده علیایی ادبیاتیمیزا ائتدیگی خیدمتلرینه گؤره, ادبیات تاریخیمیزده قالارقی شخصیتلردن اولاجاقدیر. او 1306ینجی ایل باکی شهرینده مهاجر بیر عائله‌ده دونیایا گؤز آچیب, یئددی یاشینداایکن عائله‌سیله بیرلیکده کئچمیش سووئتلر آذربایجانیندان چیخاریلیب, آتا بابا اوجاغی اولان ساراب ماحالینین دوننی کندینده مسکونلاشیبدیر. سونرالار ساری, تهران و کرج شهرلرینده یاشاییب, اوزون ایللر فارس دیللی ادبی درنک‌لرده فعالیت گؤستریب, انقلابدان سونرا آذربایجان ادبیاتی‌لا ماراقلانیب و بو ادبیاتین انکشافیندا اونودولماز و چوخ دیرلی خیدمتلر ائدیبدیر. فارس ديلينده “ققنوس”، شگفتيها”، “بانگ پدر”، “ساقينامه” و “احساس من” و آذربايجان ديلينده “آذري نغمه‌لري” و “قانادسيز پروانه‌لر” آدلي شعر مجموعه‌لري یاییلیبدیر. او ادبیاتیمیزا ائتدیگی اونودولماز خیدمتلرینه گؤره آذربایجان یازیچیلار بیرلیگی‌نین فخری عضولیگینه سئچیلیب و شرفینه ادبی- مدنی درنک‌لر طرفیندن یوبلئی‌لر تشکیل ائدیلیبدیر.

اوستاد علیایی ساهر ادبی- مدنی درنه‌یی‌نین آق ساققال‌لاریندان اولماغینا باخمایاراق, بوتون آذربایجان ادبیاتی و اینجه‌صنعتی ساحه‌سینده فعالیت گؤسترن ادبی- مدنی درنک‌لرین جیددی حامیسی اولوبدور و اوزون ایللر بو درنک‌لرین قورولوب و ثمره‌لی فعالیت ائتمه‌لرینده اونودولماز رول اویناییبدیر.

اوستاد علیایی‌نین آنیم مراسیمی شهریور آیی‌نین دؤردونجو گونو(دوشنبه) یاشادیغی کرج شهرینده (فردیس‌ده) کئچیریله‌جکدیر. اوستادین سون سؤزونه اساسلاناراق بو مراسیم اونون شخصی ائوینده اولاجاقدیر.

بیز ادبیاتیمیزین اونودولماز خادیم شخصیتی و انسان‌سئور, وطنپرور شاعری اوستاد آقازاده علیانی‌نین شرفلی خاطیره‌سینه عشق اولسون دئییر و بیر داها خاطیرلادیریق کی:

ازلدن یارانیب چونکی کائینات

جاهان دائیمی‌دیر, عؤمور آمانات

الدن اله کئچیر وفاسیز حیات

بیز گلدی- گئده‌ریک سن یاشا دونیا!

“ایشیق” سایتی‌نین اداره هئیتی و ادبی شورا عضولری

اوستاد علیایی‌دن ایکی شعر:

(1)

قارا گونلر قاراسين گوندوزه دؤندرمک اولار

بولبولو باغچالارا، باغلارا گؤندرمک اولار

قارا ظلمت تؤره‌دن کس قانا بيلمز بو سؤزو

عرشه‌ده چاتسا اونو عرشدن ائنديرمک اولار

آنلامير خلقيميزين “قوچ نبي”سي، “روشن”ي وار

فتح اوچون اونلاري‌دا ميدانا گؤندرمک اولار

بمبالارلا بيليرم سوسماياجاق شانلي ائليم

بير يانار وولقان اولارسا اونو سؤندورمک اولار

قول- قولا وئرسه ائليم دونياني آزاد ائده‌‌ريک

ديل آچيب، شاعر اولوب ملتي دينديرمک اولار

غم- کدر چولغاسادا اؤلکه‌مي “عليا” بيليرم-

دؤوراني گلسه يئنه ملتي گولدورمک اولار.

(2)

اؤز آييم، اؤز اولدوزوم وار اؤزگه ماهي نئيليرم

وار ساري تئل دلبريم، زلف سياهي نئيليرم

ناز باخيشلار کؤنلومو يوز دفعه مفتون ائيله‌ييب

بير دؤنوب باخسا ياريم اؤزگه نگاهي نئيليرم

ائل يولوندا چاشمارام، آيري طريق آختارمارام

من غريبه مسلکي، بيگانه راهي نئيليرم

داغ تکين سؤيکنمه‌يه شانلي ائليم واردير منيم

اؤزگه‌لردن تکيه‌ني، پشت و پناهي نئيليرم

بير هاراي وورسام جوشار سئللر کيمي قوچ بابکيم

خائن افشين‌لر ساياقدا دادخواهي نئيليرم

“عليا” نازلي سئوگيليم شاهددي عشق پاکيمه

عشقيمين اثباتينه آيري گواهي نئيليرم.

 

2 پاسخ

  1. یادیمیزدا – روحو شاد اولسون.
    كيمدي ؟
    نه قدر يازما يازیم
    يازما اۆرك تۆستوسدی
    قان ايچینده گؤزریر
    من کاغاذا هی پۆلیرم،
    بیر سوْيوق آرزی گلنده
    آچیرام قوْل قانادی .
    پارالانمیش اۆرگيم
    زۆمزومه ائتمکده منه
    کی گئدن گلمیيجک
    گئدی گلنمز يوْلونا،
    اسگن يئل سۆرونور
    هی قاپی يا تاقا چالیر
    دئيیرم اۆز اۆزمه
    کیمدی گلیر؟
    کیمدی گئدیر؟

  2. اوستاد علیایی نین وفاتینی اونون حقیقی دوستلارینا ،آذربایجان ادبیات سئورلرینه ، شاعیر و یازارلاریناو محترم عایله سینه تسلیت دئییرم. آغیر ایللرین اونودولماز شخصیّتلریندن بیری ده اوستاد علیایی ایدی .اونودولماز کیشیلرین بیری ایدی. صاف اوریی، آیدین فیکری وار ایدی .گنجلیک ایللریمیزده بیزه و ادبیاتیمیزا چوخ سایغیلار بسله یه ن کیشیلردن اولدو .ریاسیز آدام ایدی. شاعیرلیگینه گوونمه دن اؤزونو ادبیات خیدمتچیلریندن بیری ائتدی. او چوخ بؤیوک اینسان ایدی. شعرلری باره ده دانیشماق ایسته میرم. اوزاق ایللرده تهران محیطینده اولان شاعیرلریمیزین گوزگو گؤسترمز یئرلرده کئچیردیکلری شعیر آخشاملاری داها آرتیق اونون هیمتیله اولاردی . اؤلومونو سایتدا اوخودوم و چوخ اوزولدوم .بللی دیر کی وفاتینین خبری لایقینجه عموم اوچون یاییلمامیش. بو بابتدن بیرداها دا اوزولدوم . روحو شاد اولسون، یولو داواملی…..تهران – ائل اوغلو/ 3/7/92

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *