چئویرن: ایشیق
ترجمه: ایشیق
ایشیق

ayat
آیت علی محمدی نین یاس مراسیمینده یولداشلاری طرفیندن اوخونان معروضه

آذربایجانین آدلیم معلم‌لریندن اولان، چوخلو اؤیرنجی و شاگیردلر تربیت ائدن مرحوم آیت علیمحمدی مرداد آیی‌نین ۱۷ – سینده تبریز شهرینده دونیایا گؤز یومدو. یاخین دوستو جناب صدوقی طرفیندن یاس مراسیمینده اوخونان معروضه‌نی اونون یاخین و اوزاقدا اولان دوست و تانیشلارینا چاتدیرماغی اؤزومه بیر معنوی بورج سایاراق، حورمتلی ایشیق سایتی‌نین امکداشلارینا بو معروضه‌نی یاییملادیقلارینا گورا دریندن تشککورومو بیلدیریرم. / ائلیار پولاد

***

گئدیرم آ دوستلار سؤزوم, صؤحبتیم

نئچه شیرین- شیرین دیللره قالدی.

گوللو یال- یاماجلار جیرانلی دوزلر

ائلین مسکنی‌دیر ائللره قالدی.

گؤزومون اؤنونده دورور همیشه

او گوللو یاماجلار یام- یاشیل مئشه

من کی آپارمادیم شئهلی بنؤوشه

چؤللرده بیتمیشدی چؤللره قالدی.

اوزاقدان- یاخیندان زحمت چکیب بو آغیرلاما تؤره‌نینده اشتراک ائدن عزیز و حورمتلی قوناقلار، فورصتدن استفاده ائدیب، حیاتا گؤز یومان عزیز یولداشیمیز رحمتلیک آیت علیمحمدی‌نین حیات یارادیجیلیغینی گؤز اؤنونه گتیریرم.

آیت علیمحمدی ۱۳۳۳- نجو ایلده سراب ماحالی‌نین اردلان کندینده دونیایا گؤز آچیر. ابتدایی و متوسطه تحصیلاتینی اردلان، مهریبان و سرابدا باشا چاتدیریر. معلم‌لیک دانشسراسیندان معلم درجه‌سینه نایل اولدوقدان سونرا، ۵۴ و ۵۵ –ینجی ایللرده سپاهی دانش عنوانی‌ایلا همدان کندلرینده معلم‌لیک ائدیر. عسکرلیک دؤوره‌سینی قورتاراندان سونرا آموزش پرورشه قبول اولاراق, رسمی معلم‌لیک وظیفه‌سینی “زرنق”- دن باشلاییر. معلم‌لیکله یاناشی تبریز دانشگاهی‌نین ادبیات فاکولته‌سینی بیتیردیکدن سونرا موغان شهرینین دبیرستانلاریندا دبیرلیک وظیفه‌سینده چالیشیر. دبیرلیک عؤمرونون سون دؤورونو تبریز دبیرستانلاریندا داوام ائتدیریر.

او شاگیردلری‌ایله چوخ یاخین و صمیمی ایدی. درس‌لر آراسیندا گونون مختلیف اجتماعی حرکت و اولایلاریندان سؤز آچیب, اونلاری آیدینلاشدیریردی. بو صمیمیت و علاقه او قدر دوغما و عزیز ایدی کی، ۹۱-نجی ایلده او خسته اولارکن چوخ اوزاق یئرلردن اونون کئچمیش شاگیردلری و بو گونون دوکتور, مهندس‌لری گؤروشونه گلمیشلر.

بو معلم آیری معلم‌لر کیمی جانی‌نین یاغینی ذره- ذره اریدیب، قارانلیق دونیالاری ایشیق‌لاندیرماغا و اونو نورا چئویرمه‌یه چالیشمیشدی. او، بوتون شاگیردلری‌نین اوره‌کلری‌نین پاس- پاخیرینی سیلیب، بیر آینا کیمی صاف، لکه‌سیز و پارلاق دونیانین برابرینده توتوردو.

آدی اوره‌کلرده یازیلان آیت، فرهنگی چابالاریندا و همده اجتماعی یاشاییشیندا بیر اؤرنک اولاراق هامینی ایشیقلارا چاغیران نور داشییجیسی اولموشدور. معلم‌لیکله حیاتدا عزت و شرفله عؤمور سوره‌رک و چتینلیک‌لره سینه گرمیشدی. او، بیر یانار مشعل کیمی ایشیق ساچاراق سون نفسه قدر گولر اوز، صبیرلی، دردین دئمه‌ین و چتینلیک‌لره دؤزن بیر اینسان ایدی.

اولدوزلار هاوانین باغرینی دلیر

قایالی داغلاردان دومان یوکسه‌لیر

خیالیم گئجه‌نی سلامه گلیر

چاپدیریر آتینی بیر باشا دونیا .

بیرده گؤرورسن‌کی آچیلان سولور

دوشونن بیر بئیین تورپاغا دولور

بیر یاندان بوشالیر بیر یاندان دولور

سیررینی وئرمه‌ییر سیرداشا دونیا .

ازلدن بئله‌دیر چونکو کاینات

حیات ابدی‌دیر عؤمور آمانات

الدن- اله کئچیر وفاسیز حیات

بیز گلدی- گئده‌ریک سن یاشا دونیا.

خاطیره‌سی عزیز و یولو داواملی اولسون

۱۸ مرداد ۱۳۹۲

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آیت علی محمدی‌نین یاس مراسیمینده یولداشلاری طرفیندن اوخونان معروضه

ایشیق
www.ishiq.net

آذربایجان ادبیات و اینجه‌صنعت سایتی

آیت علی محمدی‌نین یاس مراسیمینده یولداشلاری طرفیندن اوخونان معروضه

ایشیق
www.ishiq.net

آذربایجان ادبیات و اینجه‌صنعت سایتی

آیت علی محمدی‌نین یاس مراسیمینده یولداشلاری طرفیندن اوخونان معروضه

ایشیق
www.ishiq.net

آذربایجان ادبیات و اینجه‌صنعت سایتی