Home / اوشاق ادبیاتی / گونه‌باخان / رامین جهانگیرزاده

گونه‌باخان / رامین جهانگیرزاده

گونه‌باخان
رامین جهانگیرزاده

گونه باخان گون اورتا
باخیر گونشه ساری
ایچینده قارا توملار
لئچه‌یی وار ساپساری

بیر گون قارالدی‌هاوا
گونه باخان داریخدی
سایاقلادی گونشی
اؤز ـ اؤزونه کاریخدی

بیر لامپا تاپدیم ائودن
دیره‌یه دایاندیردیم
پریزه سالدیم سیمی
باشی اوسته یاندیردیم

ایشیق دوشدو گؤزونه
اویاندی گونه‌باخان
دیک آتیلدی یوخودان
دایاندی گونه‌باخان

ائله بیلدی گونشدی
سئویندی دوردو یئردن
لامپایا ده‌ین کیمی
جیزیلدادی او بیردن

اوخ ـ اوخ دئییب چیغیردی
منی باسدی یامانا
پریزدن چکدیم سیمی
چکدیم آتدیم اویانا

گئتدیم پوماد گتیردیم
یانان یئرینه سورتدوم
ساریق ایله ساریدیم
یانمیش یئرینی اؤرتدوم

بیر آز توخدادی دئدی:
ـ آی سنی شیطان اوشاق
منی آلداتدین یئنه
دونیانی قاتان اوشاق

بیر نئچه گون سوووشدو
گونش یئنه تاپیلدی
گونه‌باخان سئوینیب
یئنی بیر نفس آلدی

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *