download
باللی و خاللی
سید رضا حسینی

باللی آدیندا آری ایله خاللی آدیندا میلچک دوستوق ائدیردیلر. اونلار هر گون چمنلیکده گؤروشور، هره اؤز ایشی ایله مشغول اولوردو. باللی چیچکلردن شیره چکیر، خاللی ایسه‌هارا گلدی قونور، نه گلدی یئییردی.
بیر یای آخشامی‌خاللی اؤز دوستونو میلچکلر اؤلکه‌سینه دعوت ائتدی. بورادا آغیز دئیه‌نی قولاق ائشیتمیردی! میلچک‌لر یئمک گؤرن کیمی‌بیر-بیرینه ایمکان وئرمه‌دن ایره‌لی جوموردولار. ائله میلچک واردی کی، یئمکدن شیشیب دوزانقوردو بویدا اولموشدو. ائله‌سی ده واردی کی، آجیندان قانادلارینی دا ترپده بیلمیردی.‌هامیسینین دا قاش-قاباقی یئرله گئدیردی.
– بو نئجه یاشاییشدیر؟-دئیه باللی دیللندی.- بو قارماقاریشیلیقدا یاشاماق اولار؟ سیزین اؤلکه‌نیزده نه عدالت وار، نه قایدا- قانون. ایندی گل گئدک بیزیم ائوه.
باللی خاللینی اؤز عایله‌سینه قوناق آپاردی. بورادا آنا آری پته‌یین اورتاسیندا ایلشیب‌هامییا گؤز قویوردو. اونون سؤزو آریلار اوچون قانون ایدی. آنا آری‌هامی‌ایله عدالتله داورانیردی. پته‌یین قارشیسیندا قاروولچو آریلار دایانمیشدی. اونلار چمنلیکدن قاییدانلاری بیر-بیر یوخلاییب پتیه بوراخیردیلار. شیره گتیرمه‌ینلری گئری قایتاریردیلار. ایشچی آریلار مومدان پتک هؤرموشدولر. اونلار حوصله‌ایله ایشله‌ییردیلر. هئچ کس بیر-بیرینین یئمه‌یینه شریک چیخمیر.‌هامی‌سئوینجله ویزیلداشیردی. بوتون آریلار چوخ شن گؤرونوردولر.
– بو قدر ایشین قاباغیندا سیز نئجه ده خوشبختسینیز؟-دئیه خاللی دیللندی.
– عدالت،نیظام-اینتیظام اولان یئرده‌هامی‌خوشبخت اولور و ایشله‌مکدن ماراقلانیر.
خاللی آریلارین خوشبختلیینین سببینی باشا دوشدو. اونو دا باشا دوشدو کی،میلچک‌لر هئچ زامان خوشبخت اولا بیلمه‌یه‌جک‌لر.