قیسقانجلیق
ویلیام فاكنر
چئویرن: علی شرین

– یئنه ده توخویورسان؟
قادین باشینی قالدیردی, اونون هامار دییرمان صیفتی واردی.. ملایم قونور گؤزلری آنی اولاراق اری‎نین باخیشلاری ایله راستلاشدی. تئز ده گؤزلرینی اوندان چكدی و باشینی آشاغی سالیب اوز ایشی ایله مشغول اولماغا باشلادی.
– گؤردویون كیمی عزیزیم.
– ائله هئی توخویورسان! اؤزونه باشقا بیر مشغولیت تاپسان آ.
قادین كؤكسونو اؤتوردو. جاواب وئرمه‎دی.
– نییه دینمیرسن, هه؟ – اری ال چكمه‎دی-یوخسا دیلین- آغزین قورویوب.
– آخی سن اؤزون, تونیو تاپشیردین كی, یوخاری ‎دا اؤز اوتاغیم دئییل, بوردا اوتوروم- قادین باشینی قالدیرمادان جاواب وئردی.
– پاه! بوردا بیر آوارایا پول وئریب خانیم كیمی بوردا ایله‎شدیریم. اودا لاققیرتی وورسون, هه؟

یاغا بولانمیش اؤنلوك تافان اؤز ایشی‎نین ماهر اوستاسی اوجابویلو گنج اوفی‎سیبانت اونلارا یاناشیب حاق- حساب قبضینی و بئش دولارلیق كاغیذ پولو اوستولون اوستونه قویدو. قادین پولون اونا اوزاتدی و بیر آنلیغا باخیشلاری اونون اؤزونده ایلیشیب قالدی. اوفی‎سیانت ساكت باخیشلا اونون ارینی سوزدو. اونون باخیشیندا استهزالی بیر تبسّوم پارلاییب, تئزده یوخ اولدو. ارینین اوستول اوزه‎رینده اوزانیقلی الی بی‎اختیار دویونلندی. او نسه تعجّوب‎لو بیر شئیی ایلك دفعه گؤرورموش كیمی بارماقلاری‎نین گرگین‎لیكدن آغارمیش سوموك‎لرینه باخدی و دوداق آلتی سؤیوش سؤیدو. قادین باشینی قالدیردی و سویوق باخیشلارلا اونو سوزدو.

– آخماق اولما آنتونیو.
آنتونیو اؤزونو قیشقیرماقدان گوجله ساخلاییردی.
– بو هله چوخ داوام ائده‎جك؟
– بونو من سندن سوروشمالی‎یام. هله آجیغینی مندن چوخلو چیخاجاقسان؟
– سنین, سنین بو ریاكارلیغین … او, حددت‎له پیچیلدادی. اونون خیردا گؤزلری غضب‎دن آلیشیب یانیردی.  قادین سكسكه‎لی حالدا اطرافینا گؤز گزدیریردی.
– یاواش- دئدی- جاماعات باخیر. آخی مندن نه ایسته‎ییرسن؟ بلكه یوخاری قالخیم, هه؟
ارینین صیفتی واهیمه‎لی ایفاده آلمیشدی.
یوخ! – اودا اؤزونو ساخلایا بیلمه‎یرك قیشقیردی. درحال‌دا سسینی آلچالدیب داوام ائتدی.
– داها من دؤزه بیلمیرم, ائشیدیرسنمی؟
او سسینی بیرآزدا آلچالدیب پیچیلتی‎یا كئچدی. – واللاه اؤلدوره‎رم سنی.
قادین یئنه باشینی آشاغی سالیب توخوماغینا داوام ائتدی.
– حالین هئچ اؤزونده دئییل. گاه دانیشیر, گاه قیشقیریر, گاه‌دا سؤیوش سؤیورسن. آخی نییه؟
– نییه‎سینی سن چوخ گؤزل بیلیرسن.
– من؟ منیم هانسی حركتیم سنی اؤزونو بئله آپارماغا وادار ائدیر؟
آخی منی سن ندن قیناییرسان؟ مگر من سنه یاخشی عؤمور- گون یولداشی اولمامیشام‎می؟ مگر من سنین بوتون ایستك‎لرینی یئرینه یئتیرمه‎میشم‎می؟ سن اؤزون یاخشی بیلیرسن كی, من هر آخشام بوردا هئچ‌ده اؤز خوشوم‎لا اوتورمورام. سنین بو قیسقانجلیغین آغلینی لاپ الیندن آلیب.
– یاخشی, یاخشی! من سنی خبردار ائله‎دیم. داها هئچ نه دئمه‎یه‎جه‎یم.- او گؤزلرینی اوستول‎دان- اوستولا گزدیردی. اوفی‎سیانت اوز چیركلی اؤنلویونده قاش- قاباقلی حالدا كیچیك چللك‎لرده‎كی سولغون پالمالارین آراسیندا گؤرونوب یوخ اولدو, تانیش اولمایان تكبّورلو قوناقلار خدمت ائدیر, دایمی مشتری‎لرینین سالامینا قیساجا جاواب وئریردی. یاراشیقلی, اوجا بویلو اوفی‎سیانت اللی و چئویك ترپه‎نیردی. او, نزاكت‎لی و خوش‎رفتار ایدی. آنتونیو ایستر- ایسته‎مز بو گنجین قیوراق, اینجه حركت‎لرینی اؤزونون یؤندم‎سیز یئریشی ایله مقایسه ائتدی و كینی قایناییب جوشدو. اوفی‎سیانت بیر ده اونلارین اوستولونا یاخین‎لاشدی. زالا گؤز گزدیردی. و آنتونیو هله آروادینا طرف اییلمه‎میش آنی اولاراق باخیشلاری قادینین صیفتینه زیللندی. ائله بو آن آنتونیو اوفی‎سیانتا طرف یئریدی. گؤزلرینه سانكی دومان چؤكموشدو. او اؤز آددیملارینی بئله ائشیتمیر، آیاقلاری دوشه‎مه‎لری حیس ائتمیردی. باشینی آشاغی دیكمیش آروادی ایسه اول‎كی  یئرینده اوتوراراق اوز مشغولیتینده‌ایدی. اوستولون اوستونده, ایچریسینده دیش قوردالایان اولان كیچیك بیر گولدان واردی. آنتونیو اوستولا طرف اییله‎رك- غیر-ی ارادی گولدانی الینه گؤتوردو و بارماقلارینی سیخدی. گولدان خیرچیلدایاراق  پارچا- پارچا اولدو, آغاج دیش قوردالایانلار اطرافا سپه‎لندی. اونون بارماقلاری آراسیندا نازیك- قیرمیزی خط عمله گلدی و بو قیرمیزی خط اوزاناراق الی‎نین آرخا طرفینه كئچدی.

– او سنه نه دئدی؟- سوروشدو.
قادین باشینی قالدیردی. باخیشلاری توققوشدو. قادینین گؤزلری بیردن بؤیودو, سانكی حدقه‎سیندن چیخاجاقدی.
– بورا باخ!- او ساكت طرزده دیللندی- دئیه‎سن سن لاپ آغلینی ایتیرمیسن. دی گؤروم مندن نه ایسته‎ییرسن؟ مگر سن اؤزون منی بوردا اوتورتمادین‎می؟ من كی, بونو سندن خواهش ائتمه‎میشم. من ده نه واخت‎سا بیر گون – دیرریك تاپمالی‎یام, یا یوخ؟ آلتی آی‎دیر كی, گونومو گؤی اسكی‎یه بوكموسن. گئجه- گوندوز زهله‎می تؤكورسن. بوتون بونلارا سون قویولمالی‎دیر, یا یوخ؟ اؤزونو ییغیشدیریب آدام كیمی آپارماسان مندن الینی, ایكی‎سیندن بیرینی سئچ. آنجاق یاددا ساخلا كی, بو آخیرینجی دفعه اولاجاق. من سنه یاخشی عؤمور- گون یولداشی اولموشام. اؤزونو اول‎كی تك آپارسان, بوندان سونرادا اولارام. آنجاق بو گونكو منظره بیر ده تكرار اولسا, داها منیم آدیمی توتما.

آنتونیو چئوریلدی سرخوش و یوخودا گزن آداملار سایاغی كنارا آددیم‎لادی. اوفی‎سیانتین یانیندان اؤتركن معصوم, هم‌ده معناسیز بیر تبسّوم یئنی‎دن اونون حیس‎لرینی جوشدوردو. او باشی‌ایله اوفی‎سیانتا قیساجا ایشاره ائتدی و مطبخ‎دن كئچه‎رك آرخا حیطه چیخدی. اورادا دایانیب گؤزلمه‎یه باشلادی. آرتیق تیتره‎مه‎یینین قارشی‎سینی آلماغا طاقتی چاتمیردی. اوفی‎سیانت اونون آردینجا چیخدی. و داریسقال قارانلیق حیه‎طده چكینمه‎دن اونونلا یاناشی دوردو. او, آنتونیودان هوندوردو. اونون سربست دوروشو دؤیوشوندن اول قیلینج اوینادانین وضعیتینی آندیریردی.
– بورا باخ- آنتونیو دیللندی. اونون سسی تیتره‎ییردی- من هر شئیی بیلیرم. اوردا سیزین آرانیزدا نه اولوب؟
– اونسوز دا هر شئیی بیلیرم. دی گوروم سیزین آرانیزدا نه اولوب؟
– بیزیم آرامیزدا هئچ نه اولماییب. آنجاق بیز ایكیمیز ده بئله حساب ائدیریك كی, سنین باشینا هاوا گلیب.
– چرن‎لمه.
– «چرن‎لمه» سن بونو منه دئییرسن؟ منه چرن‎چی دئییرسن؟
گنج اوفی‎سیانت ایره‎لی شیغیدی. آنتونیو اؤزوندن آسیلی اولمایاراق گئری چكیلدی. قورخاق‎لیغینا گؤره اوره‎یینده اوز- اؤزونه نیفرت اوخودو.
– آخی من بیلمه‎لی‎یم, یا یوخ؟ آز قالیر آغلیمی ایتیرم.
– اونسوزدا آغلینی ایتیرمیسن. بئله اولماسایدی سنین جانینی آلاردیم. بورا باخ ائی موردار دونوز, بیل كی, بیزیم آرامیزدا هئچ بیر شئی یوخدور. بونا آند ایچه بیله‎رم. آنجاق قادینا یازیغیم گلیر. من سنین باشینین اوستونده اونا نه دئدیم كی, سن ائشیتمه‎یه‎سن؟ اگر او قادین كیمیسه اؤزونه جلب ائدیرسه, هر حالدا او آدام من دئییلم. بونو اونا گؤره دئییرم كی, منیم اونا یازیغیم گلیر. هر گون سنین كیمی‎سینین شیلتاقلیغینا دؤز‎ن باشقا بیر قادینادا منیم یازیغیم گلردی.
– ائله ایندی‎جه سن اونا نه دئدین؟
گنج اوفی‎سیانت اونون صیفتینه بیر سیلله چكدی. آنتونیو دال- دالی چكیلدی.
– من سنی اؤلدوره‎رم!- دئیه باغیردی.
– باجارمازسان, – دئیه اوفی‎سیانت دیللندی. – سن منی یالنیز نامردجه‎سینه اؤلدوره بیلرسن. بس اوندا سنین باره‎نده نه دوشونرلر؟ آروادین سنی نامرد آدلاندیرسا خوشونا گلرمی؟ ایت اوغلو- ایت!

تك قالمیش آنتونیو اوره‎یینی سویوق دیوارا سؤیكه‎دی. او چتین نفس آلیردی. اؤز حیرص- حیلله‎سینه گؤره قورخاق‎لیغینا و كین- كودوره‎تینه گؤره اؤزونه نیفرت یاغدیریردی. بو حقیقت ایدی. اوفی‎سیانت اؤلدوره بیلمزدی. او باشینی قالدیردی و بو داریسقال حیط اوزه‎رینده سانكی محکم ایپك كیمی تاریم چكیلمیش اولدوزلو سمایا باخدی. اولدوزلار اوشاقلیغیندان اوزاق سیجیلی‎یادا گؤردویو همین اولدوزلاردی. اوندا او, بالاجا بیر اوغلان اوشاغی ایدی و حیات ساده, گؤزل و قایغی‎سیز ایدی.
اؤلدوره بیلمز! اولوم فیكری اونو هئچ راحات بوراخمیر. آنجاق او بیلیردی كی, داها اوندان سونرا آروادینین اوزونه باخا بیلمز. بیلیردی كی, آتا اوجاغیندان اونا یئنی‎جه پناه گتیرمیش اونون اوچون بوتون دونیادا حیاتین اؤزوندن بئله قیمت‎لی اولان بو قادین – اونون اوجباتیندان كی, بو حادثه باش وئره‎جكدی- اونو هئچ واخت باغیشلاماز. آنتونیو. آرتیق یاشا دولدوغو, كیفیرلشدییی و كؤكلدییی حالدا, او هله جاوان و خوشا گلیم‎لی ایدی.

آنتونیو كیمی باشقا كیشی‎لرین ده اونا مئیل گؤسترمه‎سی مگر تعجّوب‎لودورمو؟ مگر تعجّوب‎لودور كی, كیشی‎لر گؤزلرینی اونون اسمر صیفتینه قیرمیزی دوداقلارینا, شه‌وه كیمی قاپ- قارا ساچلارینا زیلله‎ییرلر؟ بس او؟ اونلارین دقتینی جلب ائتمك اوچون بیر شئی ائدیرمی؟ یوخ! اؤزونون دئدییی كیمی قادین اونا یاخشی عؤمور- گون یولداشی اولموشدو. كؤچوب گئتمك. یگانه چیخیش یولو بودور. اونو باشقا شهره آپارماق.  یئنی شرایطده تانیش اولمایان آداملار آراسیندا داها قایغی‎سیز یاشایا بیلیرلر. او بئله‌ده ائده‎جك. او  یئنی‎دن باشینی قالدیریب یوخاریدا سایریشان, اونون طالعی تك قارما- قاریشیقلی اولان اولدوزلارا باخدی. ترلی دری‎سینده سرین گئجه كوله‎یینین تماسینی حیس ائتدی و كؤكسونو اؤتوردو. آخیر كی, بیر قرارا گلمیشدی. آروادی دئمك اولار كی, راضی‎لاشدی. بو پلانی قادینین والدین‎لری مذاكره ائتدیلر و بئله بیر آددیمین ضروری‎لییینه اونلاری ایناندیردیلار. و یقین كی, قادین هردن بیر اؤز والدین‎لرینه ارینین گئت- گئده آرتان بو قیسقانجلیغی و حیرصی- حیگگه‎سی باره‎ده معلومات وئریرمیش. اودور كی, بو قرار او قد‎ر‌ده والدین‎لرینی تعجّوب‎لندیرمه‎دی. عمومیت‎له اونلار آنتونیونو آغیللی حساب ائدیردیلر. سارسیدیجی قیسقانجلیق خسته‎لییینه توتولانادك ایسه اونا حتّا خوش‎رفتار, سؤزله یاخشی ار كیمی كی, اونون هر بیر فیكرینه شریك اولور. دئدیكلری ایله راضیلاشدیلار. بو قرارا گلدیكدن سونرا آنتونیو اؤزونو یاخشی آپارماغا باشلادی. ایشلری او قد‎ر روان گئدیردی كی, او حتّا قرارینی دییشمه‎یه بئله حاضردی, لاكین آروادی فیكریندن دؤنمزدی. رئستورانی ساتماق فیكری اورتایا چیخدیقدا همین او اوجابویلو گنج اوفی‎سیانت اونو آلماغا حاضر اولدوغونو بیلدیردی. آنتونیو ایله اونون آراسیندا مناسبت هله‌ده گرگین ایدی. آنتونیو هر وجهله اوندان چكینیردی. اونلار قییمت مسله‎سینده راضیلاشما اوچون بیر- بیری ایله اونسیته گیرمك مجبوریتینده قالدیقدا. مشتری اؤزونو ائله آپاردی كی, سانكی هئچ نه اولمامیشدی. اونون آقایانا گولوشوم همین‎كی گولوشویدو. اونون بو گولوشو, توتغون صیفتینده دیش‎لرینین پاریلتیسی آنتونیونو تب‎دن چیخاردی. اؤزونون دوشوندویو كیمی, سؤنوب اؤله‎زیمیش كین و قورخو حیسّی یئنی‎دن آلوولانیردی.

بو دفعه اوفی‎سیانت اول‎كیندن ده ملایم و نزاكت‎لی ایدی. او سینیورا وداع هدیه‎سی باغیشلاماق فیكرینده اولدوغونو, بیلدیردی و بو فیكیرده ائله نزاكت‎له عنادكارلیق گؤستریردی كی, اونلار امتناع ائده‌ بیلمیردیلر. نهایت، گون‌اورتا آنتونیو ایله اوفی‎سیانت هدیه سئچیب آلماق اوچون شهره چیخدیلار. جاوان اوغلان بیر دوزوم بوللور مونجوق و یا مئدالیون هدیه ائتمك ایسته‌ییردی. بو جور شئی‌لر ساتیلان آنتیك‌وار ماغازاسینا داخیل اولدولار. پیش‌تاختا اوزه‌رینده اوست- اوسته قالاق- قالاق شكیل، گولدان، اویونجاق، قادین زینت شئی‌ٌلری، تونج اشیالار و قدیم سیلاحلار ییغیلمیشدی. اوفی‎سیانت نظرده توتدوغو شئی‌لری گؤتور- قوی ائدیب آلماق ایسته‌دییی مدتده آنتونیو ساكیت‌جه كناردا دورموشدو. آلیجی پنجره‌نین یانیندا دایانمیشدی. یوخاری قالخمیش الیندن مونجوغون ساپی ساللانیردی. باشی قاریشیق اولان اوفیسیانتین مدافعه‌سیز اولدوغونو آنتونیو ایندی درك ائتدی و ایلك دفعه ایكی‌لیكده بیر اوتاق‌دا اولدوقلاری بیر آندا اونو سانكی یوخودان آییلتدی. رقیبی‌نین حیاتی ایندی اونون الینده ایدی. همین آنداجا اونون الی بی‌اختیار پیش‌تاختا اوزه‌رینده اوست- اوسته ییغیلمیش جیر- جیندیر آراسیندا مناسب سیلاح آختارماغا باشلادی. لاكین داخیلینده هانسی بیر قووه‌سی اونون بئینینده‌كی بو آنی فیكیردن داشینماغا سؤوق ائدیردی. آخی هر شئی یولونا قویولموشدو. صاباح او بو شهردن كؤچوب گئده‌جك و بو آدامی بیر داها گؤرمه‌یه‌جكدی. یوخ، آشنا، دئمزسن‌می آلداتدیم؟

آنتونیو اله چوخ راحات یاتان بو قدیم تاپانچاسینین اصل اؤلوم ساچان بیر آلت اولدوغونو خیالیندان كئچیردی- باخ بئله- و آغیر- آغیر تاریخین پاسلی یادگارینی الینه آلدی. باش‌بارماغی ایله چاخماغی آیاغا چكدی و تاپانچاسی‎نین اوتوز ایلده ترپنمه‌ین یایی محكم سیخیلماغا باشلادی. «باخ بئله»! – دئیه آنتونیو اونون نییتیندن خبرسیز اولان، اول‌لر بیر دفعه اؤلدورمك ایسته‌دییی اوفی‎سیانتی نیشان آلاراق اؤز- اؤزونه پیچیلدادی. و تتییی چكدی. كیچیك اوتاغی گورولتو بورودو. لوله‌دن آلوو ایلدیریم كیمی باییرا شیغیدی. گنج اوفی‎سیانت اولجه شوشه وازلارلا و قدح‌لرله دولو اولان پیش‌تاختانین اوزه‌رینه سریلدی، سونرا ایسه سوروشوب دوشمه‌یه دوشدو. الینده داغیلمیش سیلاح اولان، دایانیب پولیس گلنه‌دك قیشقیران آنتونیونون سسی اوتاغی باشینا گؤتورموشدو.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4