IMG_1978
اوچون شعیرلریم
هاشیم ترلان

دوزولون، صف چکین چین دیواری تک،
لاله‌دن، ریحاندان تر شعیرلریم!
دیلیمه خور باخان دیز چؤکسون گره‌ک-
سیزین قارشینیزدا، تر شعیرلریم!

سیزی پولاد کیمی من سوواراندا
دئدیم: دوشمانی‌یام مؤحنتین، یاسین.
دؤیوش مئیدانیندا صفلر یاراندا،
یاغی پنجه‌نیزدن اوزاقلاشماسین.

هایدی شعیرلریم پرواز چاغی‌دیر،
یئنه نعره چکیر قیلینجلار، باخین!
“عراق” عربلرین اؤز تورپاغی‌دیر،
اوچون، قاناد چالین، شیمشک تک چاخین!

سارایلار اوچولور، داخمالار یانیر
دیری بیر میللتین بوغولور سسی.
عربلر، قینیندا باخیر، بویلانیر،
یاغیر دوشمانلارین توپو، گولـله‌سی.

حربین موقدسدیر سنین ای عرب!
توفنگین ناموسون، اؤز شرفیندیر.
سنی زیرولره قالدیران غضب
بیرده حاق دؤیوشون، دوز هدفیندیر.

دوشمانین، منیمده دوشمانیمدی بیل!
دیلیمیز آیری‌سا، یئر کوره‌میز بیر.
جاناوار جیلدینه گیرن “اسرائیل”،
بیلسین، دونیا بئله گئتمه‌یه‌جکدیر!

ائوين داغيليبسا اى “افغانلى” گل
اؤز كؤنول ائويمده يئر وئريم سنه!
قانادين،آغريدان ائتمسه عمل،
گل، اؤز قاناديمدان پر وئريم سنه!

فیرعونلار تيتره‌‏دن بير قلميم وار،
بيرده توپ داغيتماز شعیر كاروانيم.
دورنا قاتارى تك سؤز عالميم وار،
سنين تك سنگرده اؤتوب هر آنيم.

حياتين سیررينى اوخويان اينسان،
نور آلار ظولمتين گؤزوندن يقين.
عزمينى عشقينه توخويان اينسان،
چیراغين سؤندورر مطلقیتين.

آلقيش اى “فلسطين” سنده‌كى عزمه
بير خالقين دردى وار يارالاريندا.
هر شعريم ضربه‌‏دير امپرياليزمه
منى كؤنوللو ياز سيرالاريندا.

باخ! بودور سوقاتيم فلسطين سنه
مرد اولان، وارينى وئرن اوتانماز.
سن حسرت قالانى دوغما وطنه،
منيم گؤزلريمه يوخو دولانماز.

 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4