rasul rza
منده اختيار اولسا
رسول رضا

من ايسته‌ييرم:
بولودلار آغلاسين
اوشاقلار آغلاماسين؛
آنالي يا آناسيز.
من ايسته‌ييرم:
گوللر آچيلسين،
گولله‌لر آچيلماسين،
آمانلي يا آمانسيز.
من ايسته‌ييرم:
قاپيلار قاپانسين
سويوق اولاندا‌هاوا.
گؤزلر قاپانماسين،
سؤزلر قاپانماسين.
من ايسته‌ييرم:
يانغين‌لار سؤنسون،
اوميدلر سؤنمه‌سين.
مئيوه‌لر ديسين اؤز فصلينده.
اورکلره سؤز ديمه‌سين.
بهردن بوداقلار اَييلسين.
اينسان باشيني اَيمه‌سين،
خجالتدن يا گوجسوزلوکدن.
آخسين بولاقلار گؤز ياشي کيمي،
تورپاغين اوزه‌رينده.
گؤز ياشي بولاق کيمي آخماسين
دونيانين هئچ بير يئرينده.
هر شئي اينسانا باخسين.
اينسان اله باخماسين.
گئجه‌لر اولدوزلار اوياق اولسون.
اينسانلار ياتيب دينجلسين؛
قووت توپلاسين صاباحين
خئييرلي ايشلرينه.
آچسين گؤزلريني
گله‌جه‌یين اوميدلي سحرينه.
من ايسته‌ييرم:
سئوينج، سعادت بول اولسون.
اورکدن-اوره‌يه،
اؤلکه‌دن-اؤلکه‌يه،
آچيق يول اولسون.
1964