معنوی تبریز
آنیر قوجام

(کئچمیشلره اوتری بیر باخیش)

دینله‌ییر عالم، چون سن دینله‌ییرسن
یارییب سکوتا چاتانلار کیمی
ایندی عالم سنین، سن عالمینسن
بوسبوتون وارلیغی آتانلار کیمی

غرب‌ده دوغولان، اوزاق شرق‌دن
فلسفه سئل کیمی یول آچیب گلیر
بیز کؤکلو بیر آغاج، کؤکده یالاواج
کندیمی اویمورم، آنجاق نور الیر

ایمان بایراغینی اسدیرن بیزلر
نورلو مفکوره‌نی یایان اولموشوق
بئله کول اولماغا اود دا یانمیشیق
هر بیر اوددان اودلو،اوزدن سولموشوق

بیز نهنگ آغیزلی اودلو اژدها
فیکیرجه کوله‌لر کیشه‌لر بیزی
عجبا غرب ایستیر گونش سؤندوره
معناجا دئییرم ، درین تبریزی

دریا ایچرمیشلر بابالاریمیز
معنا شرابیندان، دائمآ پیان
عشقدن سرحدسیز حقه چاتانلار
نئچون باخمیرسینیر کئچمیشه عیان

او غربین نه یی وار کی بیزده یوخدور
اسکی دگیرمانیق ، دارتدیق هر‌دنی
ایندی اولادیمیز اویور اونلارا
حق و حقیقت سؤیلور هر گلنی

گئرچک وارلیغیمیز‌سیلکه‌لنیرسه
مینلر بودا توکر، مینلر عیسا
امت‌یم عالمی اوستوندور دئدی
یالان اولسون امر مصطفی حاشا

بیزه کی دئمیشلر اودلار دیاری
اودو ذیروه‌لردن گزیب آراما
اودلو‌سینه‌لردن طلب ایله آل
غیردن باغلاما مرهم یاراما

یئدی یوز ایل اونجه تبریز دورومون
(مجدالدین)وصف ائدیر باخ سفینه‌یه*
اوندا نه دئییردین، ایندی نه دئرسن
گؤز یوم اؤزگه‌لره، آچ دفینه‌یه

مقصد دفینه‌دن تبریز‌روحودور
معنوی تبریزدیر قصدیم نه شهر
تبریز بئجردیب‌دیر مینلر شمس‌الدین
گل اوزون مثنوی اول آیری طهر

لابد ایماء ایله بو اشاره‌دیر
ثنویت کی وار مثنوی سؤزو؛
” مثنوی اوخویان شمس‌سیز اولماز” –
کتاب شریف معنوی سؤزو

گونش‌سیز داورانیش اولماز بیر آنلیق
لیکن قمرسیزلیک ممکن کی یعنی
ایللردن ایللره شمس‌الحق گزیر؛
کی یاران! بو دوران مئولانا هانی؟

شمس‌الدین دیلردی مئولانا گلسین
اؤزوایله برابر تبریزی گزسین
اودلار یوردو قلبین، معنویتین
ارنلر حضورون یاخیندان سئزسین

بو امکان اوز وئرمیش اولسایدی اگر
ناصیل یازیلاردی کتاب بیلمریک،
آنجاق آشیللانیب تبریز‌روحودور
بونونلا مئولانا جاهین‌سیلمیریک.

غرض منیمسمک مثنوی‌روحون
او‌روح بورادادیر، قونیوی دئییل
او‌روحو بیلمکچین باشقا بیر بیلگی!
چون دئدیگین تبریز‌دنیوی دئییل.

بنزرم دریادان طشره دوشنه
شمس‌الدین قونیادا بونو دئییردی
تبریز باطنی‌دیر منجه او دریا
بویور دوش دریایه قورخما خییردی

دؤندر قلب اوزونو تبریز قلبینه
اوندان ایشیقلانسین، مددلر آلسین
علوی مربی‌دیر بو وادی‌روحو
صدق ایله اول یاخین، قلبینه دالسین

تبریز اؤزون سسلن، منکی دیلسیزم
سنین شرفینه عالم حاسددیر
سویله قطب عالم سنسن گمانسیز
سن‌رونق اوزوسن، ظاهر کاسددیر

تبریز یاتار ایسه عالم یاتاجاق
عالمین جلوه‌سی تبریزه باغلی
یافتی ! سن چالیش سئویندیر اونو
بو سلطان قلبی‌دیر یاراشماز داغلی

دده‌لر‌روحوندان مدد آلاراق
انقلاب گرکدیر علم معنادا
محمد مصطفی ائیله‌سین نظر
باخدیم آنیرقوجام یازیب آینادا ؛ _

کؤکوموز ایچیندن نئشه‌لنیرسه
یوخدور اسگیگیمیز، هر زادیمیز وار
آنجاق او نئشه‌یه یئتیرمک لازیم
اوندا ؛‌لیس فی الدار غیره دیار

حضرت شمس‌الحقین، مئولانادان عینی چیخش و ظهور ائتمه‌سی

بیر شیخی وارایمیش کئچمیش زاماندا
ائلجه بیلن ایمیش، اوره‌گی آچیق
خبرلر وئریرمیش عیان غیبدن
لیکن دیل‌رعشه‌لی، سؤزلرسه قاچیق

دینلرمیش صحبتین میندن زیاده
مجلسین گؤرنلر واله اولارمیش
صحبتلر ائدرمیش اولدقجا فصیح
دیله‌رعشه گلجک، بیردن سولارمیش

انتظار بایراغین جامات آچاردی
سؤز آردین توتونجا ساعات کئچرمیش
مصحف اوخونورموش استحباب اوچون
شیخ ایسه اثناء‌ده شربت ایچرمیش

گؤزلمک ائرردی نهایت صونا
یئنه صحبتین آچیلاردی یولو
یئنه شیخ صحبتین آردین توتاراق
ساناسان گویلردن تؤکولور دولو

بو شیخین مریدی اولموش حسن نام
قلبی شیخین قلبی، سؤزو شیخین سوزو
قلب و‌روح و جاندا شیخ ایله واحد
نه شیخ ایله واحد، کی شیخین اؤزو !

خدمت‌ نیت ایله، خدمته عامل
دیله‌دی؛ “انتظار خلقدن زایل ”
شیخ آگه اولارکن بویوردو ؛ “آمین
حسن‌نیتینه عملده نایل”.

او گوندن سونرالار‌رعشه گله‌رک
شیخین خطابه‌سین حسن دئیردی
شیخ شربت ایچردی و دینجلردی
دیل قاییدارکن ، “احسن!” دئیردی

***
دوغور محبت‌دن بویله کرامت
سئچیلمز اولاردی بیر بیریندن او
عینی سوز، عینی سس، خلق ایسه غافل
او امام گئتدیسه شیمدی دئییر بو

شیخ ایله اول حسن نقلین دینلدین
شمس ایله مئولانا احوالی‌دیر بو
دغروسو مثنوی شمسین صحبتی
ظاهرده مئولانا اقوالی‌دیر بو

تبریزه بیر گونده اولسون گلمدی
بس تبریز اردمین،‌روحون هارادان
قازانیب مئولانا کتاب باغلادی
جواب وئریلجک داها تازادان

بوگونده عالیملر یاخشی باخیرلار
روح افاضه‌سینه، تربیتینه
سنده گل دقیق اول باخ حقیقته
مثنوی توپراغی و طینتینه

حال، مقام، حافظه تفویض اولونور
محبت گوجیله محال، حال اولور
کرامت انساندا بوندان آرتیق یوخ
الف محبتدن بیر ابدال اولور

تبریز مئولانادان حیران ائدیجی
قاباریر، بویلانیر اوزون گؤستریر
آلدادیرلارسادا بو گون بیزلری
او قونیا گوزگوسو دوزون گؤستریر

بونا اعتبارا مثنوی سوزو
معنوی تبریزین گوی بایراغیدیر
قالخ اسدیر بایراغی تبریز شهرینه
شهر یوخ سهو اولدو، شاه اویلاغیدیر

حضرت شمس‌الحق تبریزدن چیخما سببی، شام و نهایت‌ده قونیه سفری

تبریز او زامانلار عرشه اوجالمیش
ظاهرده، باطنده استغنادایمیش
هر زادین اولی، هر زادین صونو
بوراسی اول‌دن منتها دایمیش

وارلی اولموشسادا تبریزیم اوندا
مین – مین قات معنوی واری وارایمیش
آچیق هر گلنه سکگیز قاپیسی
سلطانا قایتارماق قوناق عارایمیش

تبریزین معنوی احوالات ایدی
هر طرف عالمدن چکیب گتیردی
هندوچین، خراسان، بغداد، شیرازدان
حقه طالبلری تبریز یئتیردی

حق عاشیقلرینه قبله اولاراق
نه قده‌ر ارنلر بوردا یاشیردی
ذکره چئوریلرک معنوی تبریز
انوار معدن ایدی،جوشوب داشیردی

بو معنوی‌لیک اؤزون سئودیریر
گور “تبریز جانیمدیر” دئیه‌ن عددسیز
هر حالدا، مقامدا گلن وارمیشسا
بیر آنلیق بورادا قالمیر مددسیز

بابالار یاشیردی هر تینلر ایچره
باخیشلار هر بیری طامه الکبری
قلبی‌لری ایسه آلاولو، وولکان
قهار، غرق ائدیجی دالغالی دریا
هر کویدان قارا نور گؤیه قالخیردی
قربدان دوشموشدور تبریز خطره
قرب حق ساقط‌لیک خطرین وئرمیش
تبریز بورادان دوشدو الحذره

خطر ساووماق ایچون تدبیر اولوندو
بو امره شمس‌الدین سئچیلدی اول
بویله سئچیلمیشدی حکم ازلدن
دون شمس‌ین بویونا بیچیلدی اول

دم همت ایله اون ایللر ایله
تبریز اولیاسی شمسه باخدیلار
دینجلیش اولمازدی صبح ایله مساء
عشقین کوره‌سینده کویوب یاخدیلار

دده‌لر همتی یاردیملار ائتدی
شمس‌الدین بورادان شمس الحق اولدو
معنوی تبریزین نور ایله‌ روحو
او نورلو قلبینه باخ ملحق اولدو

سله‌چی بوبکیر شمسه قالخ دئدی
بو نوری عالمه تئزجه یای دئدی
حقدن مامور اولدون، قورخمادان یورو
یوللوق وئررکن‌ده، بو اوخ، یای دئدی

باقی ماجرا بیلدیگین کیمی
مئولانا گؤروشو، شامات سفری
اخی‌لر قصه‌سی، مثنوی سؤزو
یئنه نهایت‌ده، عشقین شهری

قرب‌دان چیخدیلار، یایدیلار بوتون
حق سسین عالمه سالدیلار تمام
ظاهر بابالاردان، باطن امر‌رب
هله‌ده سسلنیر او سسلر، والسلام.

ایندی او بابالار، بؤیوک، اولولار
دای بیزدن، تبریزدن اوزاقلاشیبلار
یئرلری بوشدورسا بوش اولماسین
اونلارکی حق ایله قوجاقلاشیبلار

آنجاق او اولولوق، او حق جذبه‌سی
بورادا تبریزده باخ یئنه‌ده وار
او کمال اوزولن، پوزولان دئییل
عاشیق هماندیرسا، هماندیر‌ نیگار

شمس‌الحق دئییردی؛ “مین ایل چکسه‌ده
زامانلار ایچیندن کئچیب چاتاجاق ،-
ایستدیگیملره سؤزوم، نفسیم،-
دگرسه، حق می یین ایچیب چاتاجاق!

بو چتین ایشلردیر، جانلار آلیشیر
آسانمی سانیرسان سانما ای سلیم
بو مکتب قاپیسی اوزره یازمیشلار
“طور وارسا کؤنلونده قورخما ای کلیم”

مدعی دئییرسه بیزلره قارشی
تبریزین احوالی یازدیغین دئییل
سؤیلرم اونلارا طلب ائتدیگین
حقیقت یوللاری آزدیغین دئییل

کور گؤزه گونشله بیردیر تورانلیق
حقیقت سئونلر قلب ایله باخیر
دوشمز دوندان دونا ثابت قدم یار
آستا گئدیرسده یولوندا آخیر

دده‌لر قان ایله جیزیقلار چکیب
اولادین یولوندان جایدیرماسینلار
اولادداسا مختصر غیرت گرکدیر
فئل ایله اصلیندن اویدورماسینلار

دؤندرک قلب اوزون اصیل قبله‌یه
گل بابالاریمیز مددکار اولسون
حشتملی میراثدیر معنوی تبریز
اوز دؤندرنلره دئیین عار اولسون

ایماء اولماسایدی آنیر قوجامدان
وظیفم دئییلدی بونلاری یازماق
حضورسوز، قصورلو یازدیغیم سؤزلر
لازم گؤرونردی بونلاری پوزماق

واختیله یاشامیش بعضی ائلجه بیلن بابالار و دده‌لره سلاملار وئر‌ه‌لیم

یئنه بابالارا سلام وئره‌لیم
عشقی سئونلری سسله‌ینلره
مقدس ‌روح‌لاری، قدسی دم‌لری
معنوی تبریزی بسله‌ینلره

قوجالار قوجاسی پیرلرین پیری
جاهل‌لر خائن‌لر یولون کسنه
مجلل حظیره صاحیبی اولان
بابالار ولی‌سی بابا حسن‌ه

صونرا محتشم فرجی صاحیبی
او ساطع الانوار شیخ اعظمه
حضرت مولانا اول بابا فرج
معنادا شهرتی بذل و کرمه

نورلو ممدآقا شیخ نخچوان
صاحب کرامت لطف و سلامت
عرفان مکتبینه شامل مددی
همدم اولیاء یولو ملامت

رحمت‌الله علیه شیخ حسن بلغار
دؤندو همتیندن کرمان عدنه
آخیر آیلاریندا مرحمت اوزره
قالمادی اورادا گلدی وطنه
جناب نورالدین بیمارستانی
شیخ حسن بلغارا هم صحبت ایمیش
شمس‌الدین تاج ایمیش او اوتادلارا
اونلارایسه شاه معرفت ایمیش

توپراقی منور هم‌ده ذوالکلام
خلیل صوفیانی، شهرتی بوله
ثابت قدملری، همتی اوجا
مددلر یاغمیشدیر طریق و یوله

داش کؤرپو باغیندا شاه حسین ولی
اؤز حظیره‌سینده یاتار اولوبدور
عصیرلر اوزونو یاردیم مددی
ابن سبیل‌لره چاتار اولوبدور…..
…….
* کتاب “سفینه تبریز”-ه اشاره‌دیر

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4