شعرلر
ارشد نظری

۱
سن چیچک دونونا نه ایچون گیردین؟
بو یولون شاختاسی، کوله‌یی واردی.
یئردن آیاغینی اوزن قوش‌لارین
گؤیده ساورولماغا له‌له‌یی واردی.
دوداغیندان سوزَن سؤز کؤلگه‌سی‌یمیش
یوخسا قایانین دا دیله‌یی واردی.

۲
هئچ زامان عهدینه قیلمازدی وفا
بو گون قرارینا دوز گلیبدی یار
اومود باغلایاردیم گله‌جک‌لره
بو گون گله‌جک‌دن تئز گلیبدی یار.

۳
داغدا بیر داغداغان اسیر نه اسیر!
ائله بیل بو آخشام تویا گئده‌جک.
کؤلگه‌سی اؤزوندن یامان تلسیر
ائله بیل بیر اولدوز آیا گئده‌جک.

۴
دنیز اوزه‌رینده سؤنن کؤپویون
قوملو یادداشیندا ساحیل قالاجاق.
بیرده ساحیلده کی قوشا ایزلردن
تورش آلچا مزه‌لی شکیل قالاجاق.

۵
ساچلارینا بیر اود دوشن سؤیودون
آتشی‌نین کؤلگه‌سینده یانان وار.
خئیری اولسون یئنه او شن سؤیودون
قوناقلاری هله بیلمیر اؤلن وار.

۶
گونئی یادداشیمین آغ پرده‌سینده
بیر سن اؤزلنیرسن بیرده صولح آی قیز!
عدالت داشییر قیرمیزی سسین
چؤره‌یه بنزه‌ییر یئرده صولح آی قیز!

۷
سنین ساچین قارادیر
گونلرین آغ،
منیم گونوم قارادیر
ساچلاریم آغ
نه فرقیمیز اولاجاق!

۸
آزادلیق هئیکلی‌نین قول‌لاری اوسته
بیر جوت آغ گؤیرچین
آجیندان جان وئریب آزاد اؤلوبلر، آزاد!
عدالتسیز آزادلیغین گؤزوندن ایراق.

۹
یول سالدیق، کؤرپو قوردوق
اؤزوموز داشا دوشدوک!
داش قالاق ائدین بیزی
بیلمه‌دیک باشا دوشدوک!

۱۰
سول الیمی‌وئردیم سئوگی‌یه
دئدیلر سولچودور،
اونلار اؤزلری بیلر
منیم کی اوره‌ییم
سول طرفیمدهدیر!