دارتینیر ایچیمده جوجه بایقوش
سهیلا نیکخواه

پئنجره‌میزدن باخیرام
گئجه‌لنمیش شهره،
قایناشیر اولدوزلار
بیتیشیر بیر-بیر چیراق‌لار
سریلیر سون باهار یارپاغی تک
یوخولار اوست – اوسته.
خورولتو سسی‌نین سیمفونیسی
لای- لای چالارکن
دیسگیندی ایچیمده
بیر جوجه بایقوش،
نئجه ده دیک باخیر ساغا سولا!
دارتینیر ایچیمده سوسقون.
یاراشماز منه یاتماق،
آهئی…
تامارزی گؤزلریم
سویروشوب خیالدان، یئره دوشدو
شیرین یوخولاری اوتقوناندا آجی چالدی.
یورویورم گئجه‌نین دارغین کوچه‌سین
باخیشیمدا
کیفسیمیش دومان‌لار دورولور،
دوداغیمدا
یارالانمیش بیر سؤز میندار اولور،
ییرتیق یول‌لاری‌هامارلاییرام،
توخویورام اپریمیش دویغولاری،
سیچراییر گونش دووارلارا
قاماشیر شهرین گؤزو.
هله دارتینیر ایچیمده
جوجه بایقوش*!

۹۸ مرداد آیی
*جوجه‌بایقوش: مرغ حق