دونیا
مقصود تقی‌زاده هریس (نیسگیل)

آرزیلاریم یاریم قالدی،
بو دونیانین یاریسی یوخ!
بلکه بونون یییه‌سی یوخ،
بلکه بونون تاریسی یوخ!

نه آلچاقدی، نه اوجادی،
تاپیلماز بیر تاپماجادی،
هر یئری باجا – باجادی،
پتک‌دیرسه، آریسی یوخ!

عؤمورو بیر، یاشی بیردی،
قبیری بیر، داشی بیردی،
آیاغی بیر، باشی بیردی،
آشاغی- یوخاریسی یوخ!

ایل‌لردیر بیزی آلدادیر،
شکر دئییر، زهر ساتیر،
بو ائله بیر یومورتادیر
آغی وارسا، ساریسی یوخ!
۹ آذر ۱۳۹۷