گؤردوم
احمد درگاهی
ایلاهی آتامین آرخاسین یئره-
جناب عزرائیل ییخاندا گؤردوم.
چؤکدو سینه‌سینه آمان وئرمه‌دی،
ال آتیب بوغازین سیخاندا گؤردوم.
چات – چات داماریندان قارا قان آخدی،
ایچینده آغلاییب، نیسگیللی باخدی،
آخینمیش گؤزلری یاندیریب یاخدی،
اؤلومله گؤز-گؤزه باخاندا گؤردوم.
اوره‌یی دایاندی، تیتره‌دی دیزلر،
دوداقلار باغلاندی، حبس اولدو سؤزلر ،
حیاتا گؤز یومدو مهربان گؤزلر،
سونونجو نفسی چیخاندا گؤردوم.
بو باهار باغچانی گوللندیرمه‌دی،
سس‌سیزجه درد چکدی، بیللندیرمه‌دی،
سون بئشیک اوغلونو ائولندیرمه‌دی،
اریییب شام کیمی آخاندا گؤردوم.
دونیا بو قدر ده آف – توفا دیمز،
بو آدام اوغروسو قاپینی دؤیمز،
شاها دا، قولا دا هئچ بویون ایمز،
نه گؤردوم آی آللاه؟ اوووخ، آندا گؤردوم .
۱۲ / ۲ / ۹۸
