Home / شعر / مئییت‌سیز مزارلار/ مسعود آذر

مئییت‌سیز مزارلار/ مسعود آذر

مئییت‌سیز مزارلار
مسعود آذر

قاپیمیزین اؤنونده
نئچه ایل دیر
مئیت‌سیز قالان بیر مزار وار،
گؤزلرین دیکمیش گؤزومه.
همن مزارین عینی
آرخا قونشوموزون
حیطینده ده وار،
اودا مئیت‌سیز.

هر ایل پاییز کولگی اسدیکده،
خزل باسیر یئییه‌سیز مزارلاری.
قیشی باشا باش،
قار بورویور،
بوز آلتدا قالیر
یازیسی پوزولموش بو مزارلار.
مزارین دووارلاریندا
یئرین دامارلاری
زینه – زینه آغلاییر؛
ایچین چالیر
یاز آی لاری گلنده.
آمما نه حاییف کی
هله ده
یایین سون گونلرینده
نیگران مزارلار
مئییدین گؤزله‌ییر.

ایللر اؤنجه
کئچرکن بوردان،
کؤچری قیزجیغاز
بیر دسته چیچک قویدو مزار داشینا.
اوزون زامان کئچیبدی
او چیچک لرده سولوب،
یارپاقلاری تؤکولوب،
کؤک سالیب توپراغا.
قیوریلیب بورویور مزاری
دولاشیق کؤک‌لر
مزار ایچی ایسه
چیچگه دولور
قوجاق- قوجاق.

مسعود آذر – آذر ۹۳

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *