قاییتماز اولدو
بهروز دولت‌آبادی(چای اوغلو)

چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف.

نئجه شعیر یازیم، تار چالیم بوگون؟
دوست گئتدی الیمدن، قاییتماز اولدو.
اونسوز خوشا گلمیر نه طوی، نه دوگون
الیم اللرینه چاتیشماز اولدو.

آرادیم داغلاردا ایزینی تاپدیم،
باش قویوب ایزینین قوینوندا یاتدیم،
خاطیره‌لر تئلین عؤمرومه قاتدیم،
سانادیم سؤزلری، گؤردوم آز اولدو.

یاشادی قارتال تک داغلار باشیندا،
لکه‌سیز الماس تک اوزوک قاشیندا،
وورولدو ایشچی‌یه گنجلیک یاشیندا،
ظالیملر اؤنونده باریشماز اولدو.

ائلیندن آلمیشدی آزادلیق درسین،
سالمادی دیلیندن وطن نغمه‌سین،
بو باغلی کیتابین آچدیم صفحه‌سین،
قیش عؤمروم بیر آندا منه یاز اولدو.

هاراییمی‌سالدیم دره‌یه، داغا،
باشیما کولکده قار یاغا-یاغا،
من گئری‌ده، تاریم دوشدو قاباغا
«چای اوغلو» سوسارکن تار «آیاز» اولدو.