قوروماز کسیلن دیللرین قانی
معصوم جبارپور

چارمیخا چکیلن آغریلاریم تک
قابارلی سؤزلریم کیتابلاریمدا.
ایللردیر یانیری بیر اووج اوره‌ک،
گؤز یاشی بویلانیر قابارلاریمدا.

قلملر، آسیلی بیر شهید کیمی
اوخشاییر، سیزلاییر آغ واراقلاری.
کؤرپه اوشاقلارین اورکک خیالی
اویادیر ایچیمده اؤتن چاغلاری.

کوهنه یارالاریم آذر آییندا
سیخیر اوره‌ییمی‌یئنی درد اولور.
۱۳۲۴ اولایلاریندا
بیری نامرد اولور، بیری مرد اولور.

هله ده گؤزومده یانان ‌کیتابدا
ایپ آتدی اوینایان اوشاقلار یانیر.
بیر جئیران بالاسی الینده کیتاب
سیلاحلی عسکری بیر قارداش سانیر!

قوروماز کسیلن دیللرین قانی،
آخی وطن بویدا قفس اولارمیش؟
یاراشمیر اَینیمه یادلارین دونی
وطن گول آچارمیش، وطن سولارمیش!

تکجه الیفبا یوخ ،تکجه لوحه یوخ،
گئجه‌دن گوندوزه یئتن یانیردی
تکجه معللیم یوخ، تکجه سؤزلوک یوخ،
تبریز آلاولانیب، وطن یانیردی.