آداملار یاخشی ایکن اؤلورلر
آراز آصف

(معدن ایشچیلرینه…)

قومرونون جانیندا کهلیک اوتو؛
قومرونون اوجاغیندا یارپیز
و چوخ- چوخ اوزاقلاردا قالمیش اوغلونون آدی شهید
و شهیدلر مظفر دؤیوشچو دئییل‌لر ذاتا
آدینی بیز بزه‌ییریک
اونلار بلکه ده محاریبه‌نین اودوزولموشلاری‌دیلار.
قومرو عؤمور بؤیو اودوزموش چیچک‌لرینی.
قومرونون بورنو پؤهره‌لی گلینلیییندن قالمیش آغ کفن
و سن،
اؤلوم کیمی دوشون هر نه‌یی.
هر نه اؤلومدن کئچیر
حتی قاپیلار بئله
و آچیلمیر قومرو خانیمین قاپیسی.
بعضا یازا بیر آز قالمیشدان پاییزلاییر هاوا
بعضا قومرونون قیزیندان دوغولور قیزیل گول؛
و سن گول
و سن گول
گوووووول
گولوشلرین قومرونون ایچینده کی دئییل؛
جینگیلده‌میر اونون قولاقلاری
جینگیلده‌ین قونشو ایتینین زنجیری‌دیر.
آزاد قادین دئییل آخی قومرو….
خوروز بانیندا ایت هورور اونلاردا
ایت بانیندا خوروزلانیر هاوالار.
قارانلیق گون اورتادان باشلانیر
و یاغیش یاغیر
یاغیر یاغیش
یاغ یاغیش و یاغیش یاغیش… تکرار اولور دامجی‌لار قومرونون ائوینده.
اوجاق سویویور
و ایتیر باتیر کهلیک هاواسی
و اؤیله‌جه اوشاقلارین آتاسی
مین تن داش آلتیندا یاتیر بیر سحر
باشقا بیر سحر ده ایسه قومرو قوردا قوناق گئدیر
قوردلار تورک دئییل‌لر
اونلار آجی قهوه ایچه بیلمیرلر.
قیرمیزی بایرافلاری اولموردا هئچ
قوردلار ساده‌جه بره‌لیرلر آداما؛
و قومرو یاخشی آدام‌دیر
یاخشی آداملار ایسه اؤلومون قونشوسودورلار
یاخین قونشولار اوزاق قارداشدان یئی‌دیر دئمیش بیری
بیری عزرائییل
بیری شئیطان
و توخونان شئیطان تورو لچه‌یینده اوتورموش عزرائییل
قومرو یاخشی آدام‌دی؛
آداملار یاخشی ایکن اؤلورلر
و اؤلوم بیزه یاراشان‌دی.
بونو من بیلیرم، سن ده بیلیرسن…

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4