asef
آرزولار …
آراز آصف

آرزولار سن بیلن قده‌ر ده ساتیریک دئییل‌لر
اونلار گولدورمورلر ده، گولمورلر ده
ساده‌جه آلمالیقدا دولاشان یاز قوخوسو کیمی اولورلار؛
بعضا ده مزارلیقدا سویوق سویوقدور هاوا، سئوگیلیم!
باشا دوشورسن‌می اوشودویومو؟
آرزولاریمدا بئله سیزاق دولاشیر…

اونلار گولونج دئییل‌لر،
اوره‌یین لال دؤیوننده باشا دوشورسن کی،
بیز هئچ واخت گولمه‌میشیک اصلینده؛
گولوش تانری‌یا ساری اوزانان مهربانلیقدیر
اودا بیزه یوخ،
بیزده یوخ؛
مهریبانلیق گؤز‌للره یارانیب عزیزیم!
تانری سیزه وورغوندور
حتی سن ده بئله؛
سن دئینده سنی قصد ائدیرم
قصد ائدیرم ده اؤلوم کیمی یوخ، آرزو کیمی…

آرزولار گونشه یول سالیرلار
سونرا گؤز تیکیرلر
سونرا شاعیر اولورلار
سونرا سنی سئویرلر
و گولورلر گولونج اولمادان
و قالیرلار یاز یاغیشی کیمی،
یاز هاواسی کیمی اعتیبارسیزدیر سنی سئومک…

زوکام مسله‌سی وار آرادا قادان آلدیغیم!
چیلپاغلیغی اؤسگورورم آذان آللاه و اکبردن تااااااااا کند ده ایت بانینا قده‌ر؛
خوروز بانلاییر ایندی
آخی کیشی‌سیزلیکده خوروزلار عاشیق اولورلار؛
عابباس‌آغا اولورلار
و آروزلاییرلار هر نه‌یی،
آغا اولورلار
و آرزولاری چین ائدیرلر
و قول وئریرلر
قاناد آچیرلار،
اوچورلار لاپ تانری‌یا قده‌ر؛
سن تانری قیزین ایسته‌سین‌لر ائلچی سایاغی
آغالارا قیسمت اولاسان ایسته‌ییرلر
و من ایسته‌مه‌دن قیسمتیمدن ایتیرسن، ایتیلیرسن…

آرزولارا باخ!
آروزلار بیز دئین اولمورلار
ساتیریک اولمورلار
هردن هئچ نه اولمورلار لاپ هئچ کیمی،
سن آرزولادیغین کیمی؛
او زامان باشلاییر دونیانین جهلی
و قوردا قوناق گئدیر باش،
باش دا پاپاغلی باش
یاراشیغلی مظفر دؤیوشچونون دیلنچی اوغلو کیمی،
تهران دیلنچیسی کیمی؛
تهران یامان شهردی دیلنمه‌یه آی آغرین آلیم آی آی آی …!
بیز تهرانین ایچینده‌ییک
تهران بیزیم دیشاریمیزدا؛
دیشاردا هئچ نه قایداسیندا دئییل
آمما تهراندان دیشاری هر نه یاخشی‌دیر،
بوردا دونیا یوخدور
دئمه‌لی جهل ده یوخدور
دئمه‌لی قوناقلیق دا وئریلمه‌ییب قوردا؛
بوردا غریزه‌دن آذان اوخونور آروزسوز – زادسیز
سونرا موغان حاماریندان تهرانا اوزانیب-
تورکجه‌میزه یییه‌لیک ائدیر
و پول قازانیر،
پاپاق آلیب ساتیر کیتاب بازاریندا…

تهران آلمالیقلیغیندا آلمالار آغاج یوخ، پولیسه اوخشاییر
آخی جئبینده الینه مشتری وار
اووجوندا اوره‌یینه ماتاه قیز
و قورخو بیضی شکلینده جانلانیر قیچ قونشولوغوندا؛
بوردا آرزو اوتوز مینه ده‌ییر
و جهلدن یانا دوران خیاوانلاردا
چؤره‌یه مینیک وئریر مترولار؛
قاطار، قاتار بیزی بیربیریمیزه
و خینجار قورخوموزدان ایچیمیزی.
آروزلار ساتیریک دئییل‌لر
اونلار قاطاردیلار بیزی خینجیرلار
و اؤلوموزه آت چاپیرلار لاپ یاتاندا بئله؛
آخی رویالاریمیز حیاتیمیزدان داها قورخونج اولور بیزیم سئوگیلیم!
قوسور شاعیر بو کلمه‌یه
آنجاق هله موسیقی یارانیر اونلاردان
-سئوگیلیم له شعری قصد ائدیرم –
قصد ائدیرم ده موسیقی کیمی، اؤلوم کیمی یوخ؛
اؤلوم قیزلارین جانینا ده‌یمیر
او قورخور بو قده‌ر اینجه‌لیکدن؛
اؤلوم ماهنی اولور چالینیر دا یوخ یوخ یوخ
اؤلوم اوخشامایا بنزه‌میر
اوخشاما سئوگیلیمه بنزه‌ییر
اوندا کی شاعیرلر هر نه‌یین گؤزلییینی اونا اوخشادیرلار
و من
من من گونو باتمیش عاشیقم غزللرده،
سنه قوربان اولوم، قوربان اولوم، قوربان اولوم ….

کسیلیر آرزولارین باشی
سونرا آذان دئییلیر
سونرا خوروزلار عاشیق اولورلار
سونرا «ایت هورور گوندوزون گول آغزیندا»….

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4