nahani_2
سنسیزلیک‌لر(۱۷)
مجتبی نهانی

(۱)
گؤزللیینین آخماجاسی
شاریلداییر، آخیر
یاپیشیر یالقیزلیغیمین الیندن
آپاریر بیلینمه‌ین تانینمازلیغا
گؤرولمه‌ینلردن یانا
هر طرفیم توتولوب
دورا بیلمیر آیاغینا
باغیشلا اؤز دورولوغونا-
سولارین سئل اولمایان سسی…

(۲)
ایتمک
هر شئیین آراسیندا
گؤرولمه‌مک
گؤزه گلمه‌مک
هئچ چکیلمه‌میش کیمی
بوتون بویالارین ایچینه قاییدماق…
بو سنسیز چرچیوه‌ده
بیری گلسین-
وارلیغیمی باتیل ائتسین.

(۳)
باخمالارین آرخاسینا-
قیلینج چکن-
گؤزلره تاپشیر
اللرین اوستونده گئدن
گوزگوسوز بیری
ایتیلیب، تاپیلماقدان یورولوب
سیله بیلرلر بوتون آیدینلیق‌لاری
سنسیز بیر ایشه یارامازلار.

(۴)
شاهلارین شکیلی
کاغیذ پوللاردان سونرا
تمرلردن باش چیخاردیر
من ایسه،
یاخشی بیر سون گؤزله‌مدن
بوش بیر سطیر آراسیندا
یوخ اولورام…

(۵)
بوتون ساری قاپی‌لاردا
آیریلیق سسی چالیردی
آق-آپباق بیر گله‌جکدن ایراق.

(۶)
قیپ-قیرمیزی بویالارا ساریلمیش-
اللریم
یاشیل باخیشلی قاپی-پنجره‌لرینه-
وورغون
دَلی-دولو بیر کوچه‌ده
سون اؤلوم اؤپوشونه-
سویونموشام
قورخما،
بیزی هئچ کیم گؤرمه‌یه‌جک
سئودا قوخوسوندان اوزاق اولانلار
گؤره‌مزلر سس‌سیز سؤیودلری.

(۷)
سنین اوزونه آچیلان
قاپی
اولا بیلرم
تکجه بیر سسین گلسه.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4