Home / شعر / گلدیک جانا … / میرحسینقلی ریاحی‌فر(سیّد)

گلدیک جانا … / میرحسینقلی ریاحی‌فر(سیّد)

riyahifar
گلدیک جانا …
میرحسینقلی ریاحی‌فر(سیّد)

گلدیک جانا بو اؤلکه‌ده سارساقلار الیندن
بیرلیک یارانا بیلمه‌دی یالتاقلار الیندن
بیچاره اکینچی چالیشیر ایل بویو آنجاق
محصول وئره بیلمیر زمی‌پیتراقلار الیندن
بیر کیمسه تاپیلسا پیسه پیس سؤیله‌سه بوردا
باشیندان آخار قان چایی توخماقلار الیندن
بئش گونلوک عؤمورده بیزی دیغلاتدی یاساقلار
باخ گؤر نه چکیب دونیا بو قالتاقلار الیندن
یوز یول یازیلیب اَیری نه دیر، دوز نه دی قانمیر
ایللر ده یازیق اولدو بو آخماقلار الیندن
اورتا دوغودا کیم یاشاسا غم یئیه‌جکدیر
جاندان بئزه‌جک دوسیه‌سی یارپاقلار الیندن
دریالاری، اوکیانلاری غرق ائتدی بو چایلار
گؤیلرده قره‌لدی بئله ایرماقلار الیندن
گون اورتانی گئچدی نییه یاتمیشلار اویانمیر
گؤز شیشدن آچیلمیر قارا یاتماقلار الیندن
یولداش دئ گؤروم تورپاغا چاره اولاجاقدیر
لاللیق ائله‌ین دیللی بو تاپداقلار الیندن؟
بیر بئیله دؤزوملو اولوسون یوخ تایی، باخسان
ایوب دا گلیبدیر دیله سوسماقلار الیندن
بیر آغ گونه حسرتدی یاشامدا دلی “سیّد”
بیلمیر نه ائده دونیادا سارساقلار الیندن

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *