Home / شعر / جئیران یئریشی / علی تقی‌زاده لاریجان

جئیران یئریشی / علی تقی‌زاده لاریجان

tagizade
جئیران یئریشی
علی تقی‌زاده لاریجان

آغرییان ایاغا درمان یاخاراق
گئتدیگی یوللارا یؤنلدی خیال.
او سونسوز یوللارا بیرده باخاراق
چولقالادی منی قریبه بیر حال.

سانکی ایدراکیمه دوشدی ولوله
دئیه‌جکلریمی‌بیر- بیر سییله‌دیم.
عقلیمه گلنی گتیریب دیله
طلبکارجاسینا بئله سؤیله‌دیم:

او سرو بویونا وورولان زامان
اووسونلادی منی جئیران یئریشین.
دلی وورغونلوغوم قویمادی بیرآن
گؤزومه عیبه‌جر ده‌یه بیر ایشین.

بیرگه آددیملادیق اوزون ایللری
ائنیشلی، یوخوشلو حیات یولونو.
دئییرم مله‌گیم گل بیر اؤتری-
سئیر ائده‌ک او یولون بیرجه قولونو.

اویوشمادی اوجا قدملرینه
بو قیسا آددیمیم، بو بسته بویوم.
اوچ آددیم گؤتوردوم ایکی یئرینه
بلکه‌هارایینا تن گله هویوم.

تمکینلی, آستاجا یئریینده سن
یئیین یئریمیشم تلسن کیمی.
سن تلسن زامان قاچمیشام بعضن
نئجه یارپاق اوچار یئل اسن کیمی.

عؤمور یوللارینین اؤلچوسو اگر
مئتیر مسافه یوخ آددیملار اولا
پاییمیز برابر اولورمو مگر
یئریسک ال اله، گئتسک قول قولا؟

کسدی کلامیمی‌گولومسیه‌رک
دئدی: قوجالیغین گؤزونه قادام.
یاش اؤتور احساسین ایتیریر اوره‌ک
پاسلی منطیقینه گووه‌نیر آدام.

حیات اوندا شیرین ایمیش گومان کی
دؤورانین حاکیمی‌جاوانلیق‌ایدی
یاواندا دادلی‌یدی او زامان سانکی
سئوگی هر یاوانا یاوانلیق‌ایدی.

او گؤزل چاغلاردان آرالانمیشیق
چوخ اوزاقدا قالیب او شیرین آنلار.
قوجالار صفینده سیرالانمیشیق
خسته‌لیک آرا بیر بیزی نیشانلار.

حیاتا سن کیمی‌باخارسام, اینان
ایتیرمیش اولارام وارلیغی بوتون.
قارالار گؤزومده ایشیقلی جاهان
بوتون آسانلاردا گؤرونر چتین.

سنی گؤزله‌میشم یوللار اوزنو
بیر یولو گئدیریک سنله دئمیشم.
یوخسا سنین کیمی‌دئسم دوزونو
گوررسن نه بویدا سهو ائیله‌میشم.

من ده اؤزوم بویدا بیرینه اویوب
شلاله‌لر کیمی‌داشا بیلردیم.
سنی‌سه توز کیمی‌آرخادا قویوب
اوجا زیروه‌لری آشا بیلردیم.

او صمیمی‌سئوگین اودلو اوره‌یین
ائله ییخمادی کی تیکیله ائویم.
دادیب او سئوگینین دوزون، چؤره‌یین
دئدیم باشقاسینی من  نئجه سئویم؟

بویون هئچ بویوما یاراشماسادا
اوره‌یین یارانیب اوره‌ییم اوچون.
منطیقین باشیندان آشیب داشسادا
سئوگیه سؤیکنسین هر اؤلچو، بیچین.

جئیران یئریشینه وورولانلارین
بیر عؤمور آردینجا قاچماغی گره‌ک.
سئوگی بولاغیندا دورولانلارین
یئلده یارپاق کیمی‌اوچماغی گره‌ک.
کرج ۱۳۹۴ پاییز

 

About ایشیق

One comment

  1. عؤمور یوللاریندا بیشمیش بیر سئوگی تصویری…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *