ansar qaradagli
داغ‌لار !
انصار قره‌داغی

او حکیم گؤزلریزی دَرده سالیب یوردو نه، داغ لار !
ائل ـ اوبا قوچ قوزو قوربان دئییب اؤز قوردونا داغ لار !

قارا کؤینکلی چوبان داغ اؤزو سلطان ساوالاندی
عؤمره شاهلیق یازیلاندان پاپاغی قاردی ـ دوماندی
قارا ساز کؤکلرینه چالغیلی سازلار هاوالاندی
بو سازین سسلری دوشمَز ، دئنه ، دوندان دونا داغ لار
او حکیم سس لریزی دَرده سالیب یوردو نه ، داغ لار !

اوبالار کؤینک اومور ائل یولونون کؤچ دلیسیندن
خسته منصور ساغالار گلسه دل افروز پری چیندن
ائل زلیخالاری وآللاه ، چیخارار یوسیفی دیندن
گتیرر میصریده یوردون کومه عشقی دینه داغ لار
او حکیم گؤزلریزی دَرده سالیب یوردو نه ، داغ لار !

کرمین هانسی یانیق بیر کرمیندن له‌له کوسموش !
اصلی لیللندیرن آیدان بیزیم آینا هله کوسموش !
له‌له داغ لار ، بو چؤلون بول هنریندن لالا کوسموش !
ساوالان کاش اؤزو بویدا بیزه بیر بوت یونا داغ لار !
ائل ـ اوبا قوچ قوزو قوربان دئییب اؤز قوردونا داغ لار !

ایلدیریملار قارا گئیسین ، قایالار قلبینه ده‌یدی
کیمسه بیلمز ، قاراداغ اصلی او لیللندیرن آیدی
چایلارین داش یازیسیندا سارادا  سئلده سوبایدی
بو اوجاق شعله‌لنیر اؤز نورو بویدا یانا داغ لار
تیک حکیم گؤزلری ، تیک ، ائل ـ اوبالار دَردینه داغ لار

او شهید قوشلارا گؤی‌لر یول آچیر ، قول ـ قانات آچمیر !
اوستوموزدن ، کؤچن آغ دورنالارین ، کؤلگه سی کؤچمور !
سیناراق یار جامی ، یار بارداغی ؛ دوستوم شراب ایچمیر
آرازی گؤر نه چکیب کؤلگه‌سینه بیر سونا ، داغ لار !
بیرحکیم تاپ او شهید دورنالارین دَردینه داغ لار

بو ، قیراقدا سیخیلان دوز ؛ چوخاسی قانلی موغاندی
قایناییر ، آمما قوووشمور یاراسی خیلی زاماندی
نه طبابتلر ائده تانری اونا ، آخیر اوتاندی !
بو ائلین قیبله‌سین آخیر دئمه‌دیز قوردو نه ، داغ لار !
ائل ـ اوبا قوچ قوزو قوربان دئییب اؤز قوردونا داغ لار !

هانسی چاغ گلدی، گوناهکار ناغیلا بیر دده وئردیک !!…
بالالی توستولری اودلو ـ اوجاقلی ، اودا وئردیک !
داملا ـ داملا اوزولوب ، شور دَره یه دریادا وئردیک !…
صاباحین صولتی دوشموش گئجه‌نین آردینا داغ لار
نئچه جان بورجلویوق آج چیلله لرین قوردونا داغ لار !

تیتره دی قیبله لرین شاه دیره‌یی سسلریمیزدن
گؤی‌لر آلدیقدا ، ییخیلدیق ولی ناکسلریمبزدن !
هله، « انصار »، توی اومور حس‌لریمیز یاسلاریمیزدان !
بیر اوووج کول یییه دورموش اود ـ اوجاق یوردونا داغ لار !
او حکیم گؤزلریزین دَرمان اولوم دَردینه داغ لار .

۱۳۹۳/۴/۱۷

2 پاسخ

  1. ای کاش مردم ایران قدر هنرمندان بزرگ را در زمان خوش میدانستند.
    اقای انصار قره‌داغی جزو هنرمندان بزرگ و نام دار آذربایجان است ولی افسوس به مردمانش.
    متشکرم

  2. عشق اولسون. انصار قاراداغلی گوجلو شاعیرلردن بیری دیر اونون دویغولاری نین نه قدر ایتی و دولغون اولماسی هر زامان گؤزه چارپیر. ساغ اولسون قارداشیمیز

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4