nisgil
شعرجیک‌لر
مقصود تقی‌زاده هریس(نیسگیل)

(1)
آدینی تامسینیرام
داماغیمدا پتک قویور آری‌لار…

 (2)
دفتریم دنیز قوخویور
گؤزلرینه چوخ شعرلر یازمیشام…

 (3)
قورخولوغومو گؤتوردو
آنام
اؤز شکیلیم دوشدو تاوایا…

 (4)
یاغیشلار چپه‌کی یاغیر
بولودلارین قارنیندا
بیر دوز باغیرساق یوخدو…

 (5)
آتام
داغی داغ اوسته قویاردی
ایندی
داغی داغ اوسته قویور…

 (6)
گونش کیمی
خیالیمدا دوغورسان
گؤزومده قارلار اریییر…

(7)
اوره ییمین دووارلاری
تیلیت قاندی
دلی دویغولاریم
گولله‌یه باغلاندی…

(8)
کوچه‌ده
اوشاقلارین
گولوب- اویناماق سسی،
کؤنلومده
آغاج آتیمین
توز بوروموش خاطیره‌سی…

 (9)
زیروه‌لری دوشونورم
دومان دولوب یاستیغیما…

(10)
گؤی ده
یئرین سویوغوندان اوشویور.
یاخاسینی
اولدوز- اولدوز باغلاییب…

(11)
بیر کوراوغلودان
مین نعره قوپاردی
ایندی
مین نعره دن
یاریم کوراوغلو قوپمور!

(12)
اوره‌ییمده
بیر کورسو قورمالییام
دویغولاریم اوشویور…

(13)
هر یئری آغارتدی قار
آه…
اورکده کی قارالار…

(14)
قانادینی
بلشدیرمه قارانلیغا،
دورنالارلا گل اوچاق!
قالساق،
قارقا باشیمیزدان آشاجاق…

(15)
اودوزدوم یولداشلاری
یولوم بیتدی،
داشیم قالدی.
ائله بیر تک باشیم قالدی!

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4