چئویرن: اکبر رضایی
ترجمه: اکبر رضایی
اکبر رضایی

آیلیغیمی آلمامیشدان قاباق بئینیمه بیر سؤز وورموشدی، اوناگؤره ده آیلیغی گؤدوردوم. آنجاق بو کی ایکی گون قاباق آیلیغی آلدیم و بئینیمه دوشموش سؤزوکی حقیقتا منه چوخ آغیرلیق ائدیردی یئرینه یئتیرمک ایسته‌دیم.
اوزون زامانلار ائوین اوشاقلاری چوخلو پول پارا گؤرمورلر، البته ائولرین چوخوندا بئله‌دیر تکجه بیزیم ائو دئییل. یازیق اوشاقلار پول پارا حاققیندا ائشیتدیکلری ائله:
سو پولو،
تلفن پولو،
موبایل پولو،
ایشیق پولو،
گاز پولو،
ملّی بانکانین آیلیق قسطی،
فیلان بانکانین فیلان وامی‌نین اقساطی،
موسسه مالی و اعتباری فیلانین وامی و … و بونلارا تای سؤزلردیر.
بئچارالارا هئچ قیسمت اولمورکی آتانین امه‌یی‌نین آیلیق گلیری‌نین هامیسینی بیر یئرده گؤرسونلر. ائله پول-پارادان سؤز آچیلدی کی رحمتلیک میرزه علی اکبر صابیرین شعری یادیما دوشدو:
سندن ال چکمزدیم اولسئیدی الیمده اقتدار
لاکن اجبارا اجل ائیلر منی سندن کنار
جانیم آغزیمدان چیخینجا سؤیله‌رم بی اختیار
نور چشمانیم‌می سن ای پول جانیم می سن
مذهبیم دینیم می، آئیینیم می ایمانیم می سن
میرزه نین هوپ- هوپ نامه کیتابینی آرادیم و کیتابلارین ایچیندن تاپدیم. بیر آز اوخودوم ایچیمی چالخالادی…
آنجاق سؤز بو کی بانکایا گئدیب و آیلیغیمین هامیسینی بیر یئرده حسابیمدان چکیب ییغدیم چانتامین ایچینه.
ائل آراسی دئییم وار(پوزو عالی جیبی خالی) من اولاردانام. دئمه‌لییم دوزدورکی منیم گؤرونتومه باخان هئچ اینانمازکی منیم چانتامدا پارا وار، آمما قورخو منیم جانیمی آلمیشدی و دؤرد گؤزلو چئوره‌می گؤزله‌ییردیم. بیرآزدا او شولوق اوشاقلار کیمی کی بیر بارا وئرنده اؤز داورانیشلاری‌لا آنا آتانی شوبهه‌یه سالیب و نه اولدوغونو بیلدیررلر منده ده ائله او وضعیت یارانمیشدی. داورانیشیم هامییا قیشقیریردی کی منده چوخلو پارا وار. دوزونوده دئسم بوکی من هئچ او قدر پارانی نئجه داشییارلار بیلمیردیم، هئچ تجروبه ائتمه میشدیم.
سونوجدا چانتامی باغلاییب عادیجه آددیملارلا بانکادان ائشیگه یوللاندیم، شوبهه منی چولغالامیشدی.
ائله بیلیردیم: هامی اوغرودو، هامی یول کسن‌دی، هامی منه اَیری باخیر…
خولاصه ایکی قیران پول، جانیمدان آرتیق سئودیگیم خالقیمین هامیسین منه اوغرو تانیتدیریردی.
آمما منده پارا اولا-اولا شهریمیزده زحمتکش ماتورچو قارداشلاردان و یا آغالاردان کی چانتا قاپماغ اوستاسی‌دیرلار هئچ بیریسی منه یاخین گلمه‌دی و دئدیگیم کیمی منی پوللو پارالی بیرینه بنزتمه‌دیلر. البته بو آرا بیر کَلَک ده ووردوم ها، اودا بوکی آلدیغیم درگینی آلدیم الیمه و اوخویا- اوخویا یوللاندیم. بئله‌سینه هامی یاخشی بیلیرکی بئله اینسانلاردا پول-پارا اولماز. هامی اونلارا سایقیلی باخار، آمما ایچدن اورکلری یانار. آنجاق من دینجلیکله ائویمه یئتیشدیم.
ائو اهالیسی حایات یولداشیم و بالالاریمی ییغدیم و دئدیم کی چوخ معنالی و دادلی دوزلو بیر گون یاشاماغی نئچه گون قاباق آیارلامیشام و بوگون اونو یاشامالی‌ییق.
اورتالیغی توپلاتدیم و هره‌نین الینه بیر بسته پول وئردیم.
آچیب سَپه‌له‌دیک، پول‌لار فیرلانا- فیرلانا گلیب یئره دوشدولر.
بیز اونلاری یئنه ده گؤتورب آتدیق گؤیه و یئنه ده اونلار یئره دوشدولر.
یئنه بیز، یئنه اونلار، هامان سو هامان کاسا دئمیشلر، دوشدولر یئره.
اوز توتدوم بالالاریما دئدیم: گؤروسوز اوشاقلار بیز پارالاری آتیریق گؤیه و اونلار دوشورلر یئره، دئمه‌لی بیزیک کی پارانی گؤیه قالدیریریق. پارانین بیز اینسانلاری هئچ یئره قالدیرماغا گوجو یوخدور، حتی اؤزلرینی‌ده گؤیده ساخلییا بیلمیرلر…
یئنه ده اونلاری آتدیق گؤیه و اونلار دوشدولر یئره.
یورولدوق، آنجاق اوزاندیق پارالارین اوستونه،
یاتدیق پارالارین اوستونه،
یازیق پارالار آیاقلاریمیزین آلتیندا قالدیلار…
بیز هامیمیز هایلاشیب، گولوشوب، قاققیلدادیق، اوزاندیق پارالارین اوستونه.
شام سوفرامیزی آچدیق، یئنه ده پارالار قالدیلار یئرده.
شامدان سونرا یئنه ده اوینادیق،
یئنه ده قیشقیردیق،
یئنه ده هایلاشدیق…
و آنجاق یئنه ده یورولدوق.
یازیق پارالار،
یئنه ده قالدیلار یئرده…
یورقان دؤشه‌گیمیزی سالیب یاتدیق.
یئنه ده پارالار قالدیلار یئرده.
یاتماق ائله دینجلتدی کی بیزی هئچ دئمه‌یه گلمز. سحر تئزدن دوروب اوخولا و ایش یئرینه گئتمه‌لی‌دیک. اویخودان دوردوق، پارالار آیاقلاریمیزین آلتیندا ازیلدیلر، سیندیلار… و بیزه باخا-باخا قالدیلار.
هامیمیزین گؤزوموزون و اوره‌ییمیزین هوس اودو سؤنموشدی، هئچ کیم پارالاری سایمیردی و اونلاری دینله‌مک ایسته‌میردی. یازیق پارالار، هئی حسرتله باخیردیلار… یئتیم اوشاقلار کیمی بیری‌نین اونلاری دیندیریب و سئوه‌له‌مه‌یینی آختاریردیلار.
هاممی یئمه‌یینی یئییب، پالتارلارینی گئییب و یوللاندیلار…
پارالار قالدی باخا-باخا،
هئچ کیم اونلاری دیندیرمه‌دی،
هئچ کیم اونلارلا قوجاقلاشیب اؤپوشمه‌دی…
آمما بیز سئوگی‌له بیربیریمیزی قوجاقلاییب اؤپدوک و اوغورلو گون آرزیلادیق بیربیریمیزه، و پارالار بیزیم سئوگی و مئهربانلیغیمیزا حسرتله حوزونتویله باخا-باخا قالدیلار.
هاممی ائودن چیخدی، من قالدیم بیرده پارالار، هامیسینی بیر-بیر توپلاییب آپاردیم وئردیم بانکالارا، سو، ایشیق، وام، گاز، تلفن و باشقا آیلیق قسط لاریمیزا.
یئنه ده آخشام اولدو و هامیلیقجا ائوه توپلاندیق، پارالار یوخ ایدی، آمما:
سئوگی بول ایدی،
مئهربانلیق بول ایدی،
محبت یول ایدی،
گولوش بول ایدی،
قاققیلتی بول ایدی،
سالاماتلیق بول ایدی،
سایقی بول ایدی،
ساده لیک بول ایدی،
بیرلیک، صداقت، بؤلوشمک، دؤزوم، یاردیم، سعادت، خوشباختلیق، قوجاقلاشماق، ال- اله وئرمک، اؤپوشمک، اومید، آرزی، یولداشلیق و حیاتی گؤزللشدیرن پولسوز-پاراسیز وارلیق‌لار هامیسی بول- بول ایدی و بیزی گه‌له جه‌یه دوغرو یاردیم ائدیردیلر.
بیز اونلاردان یارارلاندیق و هر زامان یارارلانیریق…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

پول- پارا

اکبر رضایی
www.ishiq.net

آذربایجان ادبیات و اینجه‌صنعت سایتی

پول- پارا

اکبر رضایی
www.ishiq.net

آذربایجان ادبیات و اینجه‌صنعت سایتی

پول- پارا

اکبر رضایی
www.ishiq.net

آذربایجان ادبیات و اینجه‌صنعت سایتی