arashh
ايندي‌كي چاتديم آلتميشا…؟!
حميد آرش‌آزاد

مين اوچ‌يوز ايرمي يئددي‌ده گلديم بو دونيايا

گلديم اولام عؤمور بويو طنزايله همسايا

 حتماً بوروكراسي آز ايميش من گلن زمان

چون صبح اولدو، چكمه دي ايش‌لر گون‌اورتايا

 منده‌ن قاباقكي قارداشيم اؤلموشدو اوّل ايل

نؤوبت منه چاتاندا، قويوب عزراييل مايا

 چون افتخارلي اؤلكه‌ده دوغموش آنام مني

دايم ايشيم گير اولدو، باشيم دوشدو غووغايا

 «كمبوجيه» گئديب، اؤكوز اؤلدوردو مصرده

يوزمين‌ده قامچي ووردو «خشايارشا» دريايا

 آنجاق‌كي، منده چون يوخ‌ايدي عقل‌ايله شعور

وئرديم بؤيوك‌لرين باشا- باش زحمتين ضايا

 اونلار خزانه‌لر تالاييب، اؤلكه‌لر آليب

من ائتميشم كاغيذ- قلمي ال‌ده سرمايا

 اونلار قوشون چكيب، دؤيوشوب شرق- غرب‌ايله

من ناخلف‌ ده‌ گيرميشم اونلارلا دعوايا

 «آدم» بابام بهشتي ايكي بوغدايا ساتيب

من‌ده بو دونياني ساتيرام ايندي آرپايا

 القصّه، گلميشم بئله دؤوراندا كئف چكم

ال‌ده قاشيق، هجوم گتيره‌م گونده شوربايا

 وارسيل يئيه‌نده خاوياري، طاووسون دؤشون

من‌ده ائده‌م قوناق اؤزومو بير يومورتايا

 گلديم‌كي طنز‌ايله اويادام خلقي اويقودان

تا اويمويا داها كلكه، رنگه، حوققايا

 گلديم رياكارين آچام اووجون بو دونيادا

بير ايش گؤره‌م‌كي، تيخديغي بال دؤنسون ازوايا

 حق چون آجي‌يدي، قاتديم اونو دادلي طنزايله

درمان اوچون، او زنجفيلي بوكدوم حلوايا

 اكديم گولوش گولون دوداغيندا بو ائل‌لرين

ائل‌ده او قدر لُطف ائله‌ييب، گلمز هئچ سايا

 تورك «آرش» اولدوم، آتديغيم اوخ دگدي دوز خالا

هئچ يانمازام جانيم اولا قوربان بو سئودايا