آژان قولی
بؤیوک‌آغا افندی

آخشام چاغی ایشدن گلیردیم؛ دربندین باشیندا گؤزوم محلله‌نین گؤپچولرینه ساتاشدی. گؤپون بازاری دام داغدی. صادیرات دئییل کی ۵۰ مین قانونی اولسون؛ جینسین بیر ایل گؤمروک‌ده قالا، آخیردا دا تیتدیا؛ تؤکه‌سن ائشییه. یئریدیم یاخینا گؤردوم آژان قولی چوپور حوسینه دئییر:
– او بیر زاد دئییل کی؛ اولار آغا، اولار! من اونناندا رهلی‌سینه راست گلمیشم . الله سیزه ده قیسمت ائله‌سین. بیلدیر یایدا آرواد اوشاغینان گئدیردیک مئشه‌ده. تهرانین او تازا دوزه‌لن ترمینالیندا قدیمی‌همکلاسیلاریمین بیرینه راس گلدیک. باخماکی بیز بیر پوخ اولمادیق، آنجاق آغا خلبان‌ایدی؛ خلبانی گئیینمیشدی؛ الینده سامسونیت کیف، دودی عینک ده ووروموشدو. منی اوزاقدان تانیمیشدی، خوش بئش اون بئشدن سونرا سوروشدی: آغا قولی‌هارا تشریف آپاریرسیز ؟دئدیم: الله قبول ائلسه گئدیریک مئشه‌ده زیارته. بیردن گؤردوم گئده‌نین گؤزلری چیراخ کیمی‌یاندی. دئدی: آقولی سنی الله یئتیریب، منیم ده پروازیم مئشه‌ده‌دیر، آمما تب لرز آز قالیر اؤلدورسون. ایستیرم خواهیش ائلییم طیاره‌نی سن سوره‌سن. دئدیم: والله من هر جور ماشین سورموشم؛ ایرمی‌ایلدی ده پایه یکم وار، آمما ایندیه‌جه طیاره سورمه‌میشم. خلبان دئدی: سن زلیخ حسن‌جن یوخسان؟ اودی با دادسرانی تک جانینا دولاندیریر، گونده یوز نفره حؤکم وئریر. سن قوخما، من سنی تانیماسیدیم دئمزدیم کی. بیرآز او دئدی، بیر آز من دئدیم؛ من اؤلوم دئدی، دای سؤزون یئره سالا بیلمه‌دیم. گئتدیک فورودگاها، اوتوردوق طیاره‌ده. دوستوم طیاره‌نین دنده منده‌سین منه گؤرستدی، دئدی: بوننان یاندیراللار، بوننان قالخاللار، بوننان دا قوناللار یئره. یازیق تب ایچینده یانیردی، قیپ قیرمیزی قیزارمیشدی. ائله سؤزو آغزیندا قورتارماق همن، یوخو توتدی. دئدیم: الله سنه توککول. بیرآز دنده مندنی اللشدیردیم. ائله کی‌هاواسی گلدی الیمه، یواش – یواش استارت ووردوم. طیاره یاندی. آخی طیاره ماشین دئییل کی بیردن زیرت استارت ووراسان. اؤزونون قیلیغی وار. دئدیم دای هرچی بادا باد، ایاغیمی‌قویدوم کیلاجا، دندنی عوض ائله‌دیم. ائله یولا دوشموشدوم گوردوم آرواد آز قالیر سکته ائله‌سین. ره –روفو قاچمیشدی، دیلی توتار توماز دئدی: سن الله آقولی مییاقات اول‌ها، وورارسان اویان بویانا دوستوندان خجالت اولاریخ. دئدیم: آرواد سن قورخما، منه ده قولی دییللر. چوپور حوسین بیر گوز ووردی، یئتیم قولام حسینه دئدی: آغا قولی ایندی یئرده سن یه گؤیده ؟ آژان قولی دئدی: لله‌شین الله کؤمکلیغینان طیاره‌نی قالخیزیب، ایندی گؤیده گئدیرم، امما بیلمیرم کی‌هارا گئدیرم. جامی‌چکدیم اشاغییه، پنجره‌دن باخدیم گؤردوم ائله بیل شومال یولوینان گئدیریک. خلباندا کاسیبین بختی یاتان کیمی‌یاتمیشدی. یئریز بوش هریانی دولاندیم. دریانین اوستوندن گئدنده لاپ اندیم آشاغییا، بیر اوندا گؤردوم آرواد باشین پنجره‌دن چیخاردیب ائشییه، باخیر دریایا. بیردن دئدی: آقولی باخ سودا بالیقلارا . دئدیم: باخ کیف ائیله، من اولاردان چوخ گؤرموشم. بیر اوندا گؤردوم آزقالیرام وورام بیر گمییه؛ فوری دنده عوض ائه‌لدیم قالخدیم اوسته، بیر آزدان سونرا آرواد دئدی: آغا قولی ائله بیل یئتیشدیک مئشه‌ده؛ اودو با آغانین گونبزلری گؤروشور. آقایا بیر سلام وئردیم. یئددی دؤره دولاندیم آغانین باشینا,؛ یواش – یواش یئندیم آشاغییا، اؤزومو یئتیردیم باندین اوستونه. قورخا – قورخا اوتدوم یئره. ایندی گل بییول خلبانی یوخودان اویات، بیه دورو ! آغانی نه موکافاتینا یوخدان اویاتدیم . دئدیم: دوستوم، دای منیم ایشیم قورتولدی، بوندان سونرا اؤزون بیلرسن. یولداشیم دئدی: دئمه‌دیم سنین ایشیندی. الین آتدی جیبینه، ایکی دانا شخ بئش مینلیق چیخارتدی قویدی منیم جیبمه. خداحافیظلشدیق، دوشدوک یولا. آرواد دئدی: آقولی من بیلمیردیم سن بوجور وارید خلبان‌سان! دئدیم: بالا من کفتار میر اسماعیل جان یوخام؟ اوچ دؤرد دانا یالاننان سققل قویوب، ایندی استانداردی.
باقال میر بؤیوک آغا توکانین چینینده دورموشدی، قولاق آسیردی. اوجادان دئدی: مالیات دئییل کی کاسیب لاردان آلالار دولتلی‌لر قالا؛ سؤزدو دئییر دا.