قارداشیم بهروزون‌ ماجراسی
افروز خانیم

دئییرم‌ منیم بو قارداشیم بهروز دا اؤزوم‌کیمین آللاهین گؤرونمه‌ین بلاسی‌دیر. سوروشورسیز نه دن؟! یاخچی قولاغ آسین دئییم. نی اصلی‌ماجرانی تعریف ائتمه‌میشدن قاباغ بیر آز بو بلاچه نی سیزه تانیتدیریم.
بیزیم بو بهروز نادینج آدامدی باخ. یانی اوشاقلیقدان نادینجییدی. هله آنام دئییر:«قارنیندا نادینجییدی. دئییر: بالا افروز او زامانلار سونوگرافی زاد بو قده‌ر‌مد دئییلدی. یانی هئچ بیزیم شهره هله گلمه‌میشدی. بو گده قارنیمدا اولاندا هردن اوشه‌نردیم بو اوشاق دئییل. بلکه‌ایلان بالاسی یا اژدهادان زادداندیر. بس‌کی چابالاییردی اویان بویانا. هردن ائله تپیک‌لرین‌ دیره‌ییردی قارنیما دئییردیم‌ایندیجه آتیلار چیخار ائشیگه.»
بئله داااا. یادیمدا بیزده اوشاق اولاندا قیز اوشاقلارینین یا چچیک‌لرین( قیسا ساچلارین) دویونله‌ییردی بیربیرینه؛ یا دونلارین اوجون؛ قیزلاری چیغیردیب گئندن باخیب‌کئف ائله‌ییردی. آللاهین حئیوانلاری دا بونون الیندن زارا گلمیشدیلر.‌ایت ؛ پیشیک ؛ تویوغ ؛ جوجه‌نین بونون الیندن امان قرارلاری یوخویدی.‌ایت‌لری سالیردی بیربیرینین جانینا؛ خوروزلاری دؤیوشدیریب قانینا بویاییردی؛ جوجه‌لری یویوندوروردی. بیرگونده بیر پیشیگی سالدی‌کؤهنه تایرین‌ایچینه اوستونه نفت تؤکدو. اوستونه چیخدیم.
– وورغون نه قیریسان؟
– هئچ‌ایستیرم بونو اوتلایام گؤره‌م پیشیک نقیریر؟
– نمنه آند اولا امام حسینین‌کسیک باشینا گئدیرم آناما دئیه‌م. تئزول حئیوانی بوشلا. خجالت چک بااا بو‌ایشلریندن. بابا دا بیلسه دریوی شیشه تاخاجاق. بئله‌جه یازیغ حئیوانی آجیناجاقلی اؤلومدن قورتاردیم.
بیر دؤنه ده ناخلف یولداشلاریلا بیر‌ایتی بیاباندا دارا چکیب جان وئرمه‌یینه باخمیشدیلار. سونرا خبر اولدوق. دئییرم بهروز بو‌ایشلرینه اللاه سنی چتین باغیشلار.
-«یوخ بابا اوندا اوشاغیدیم آنلامیردیم؛‌ایندی گؤر قوشو‌اینجیدیرم؟! آللاه بؤیوکدو باغیشلار آنلامازلیغیمیزا ؛ سن ده اوره‌ییمین یاغین اریتمه.
بونلاردان علاوه بیزیم بو بهروز چوخ دا جوگیردیر. یانی بیر فیلمه زادا باخسین؛ تصورونده او فیلمین قهرمانی اولور. بیر دؤنه اوندا ویدیو- سی دی ‌مودویدی. بروسلی فلیمینه باخیب اوندا گؤردوک عنتیقه بیر‌های‌کوی قوپدو. آغا نجورکی بو بروسلی‌نین اداسین چیخارداندا؛ یئرله گؤی آرا اوچور خیالی حریفه حمله آپاریر؛‌کله سی تاراق‌کئچدی قدیم تاختا قاپیمیزین جفته سینه. آنام‌کؤتک قالمادی اؤزونه ووردی؛ بیر شیکیل بو جفته‌نی باشیندان‌اییردیق؛ ارژانسا قاچیرتدیق؛ باشی ییرمی‌بخیه یئدی.
بیر گونده گویا بیر قیزا ویریلیب آنام گیل گؤیول وئرمه‌ییب؛ بو گئدیب هندی شعله فیلمینه باخیب؛ آغا جو توتوب؛ ویریب شوشه‌لری قیریب؛ راجا‌کیمین اوستونده یئرییب. اوندادا بیر شیکیل شوشه‌لردن چکیب قیراغا ؛ دردین آناندان سونرا هئش زاددااا؛‌ایسته‌دیگی قیزی آلدیق بونا. خیلاصه بیزیم بو بهروز چوخ آشین دامازلیغیدی. نی سؤز چوخ اوزانماسین دئیه بوگونکو ‌ماجراسین سیزه دئییم:
بوگون آدینا گونودو؛ بیر هفته چالیشماق و‌ایشدن سونرا ؛ دئدیک بیر تعطیل ائلییه‌ک خوش اولاق. قیزلارادا ؛ اره گئدندن سونرا ان خوش‌کئچن یئر‌هارادی؛ «دده ائوی». ناهاردان سونرا غزاله‌نین الیندن توتدوم گئتدیم آنام گیله. گؤردوم آنام تلویزیونو آچیب اوتوروب قاباغیندا. خوش گلدین سالاملاشدیق. دئدی بالا یئنه بو تیلفیزیونلا باشیم قال اولور. هممی‌غمیم داغیلیر. بونودا بو گونلرده‌کی‌ کولک آنتنلین سیمین قیریب توتمور.‌های بهروز‌هارداسان؟ اوندا گؤردوک بهروزون رنگ به رنگ گؤورچینلری شاققا- شاق گؤیه اوچوشدو. دئدیم: ننه بهروز‌هاردا اولاجاق‌کی ؟! دامدادی. گده ائولندیده آدام اولمادی. قوش اوچوردور.
– هه بالا. دوروم دئییم او آنتلی ده جورلاسین. پنجره‌نی آچیب چیغیردی:‌ای بهروز ننه‌ن قوربان او آنتلی جورلا بالامسان. ‌کولک قیریب. آمانین گونودو برق دن گؤزله‌هاااا.‌منی پئشمان ائله‌مه. خونتورو برقدن چک.
بهروز آنانین سسین ائشیدن الینده قهوه‌ای بیر گؤورچین گلدی دامین قیراغینا.
« گؤزوم اوسته ننه. آرخایین اول ‌مییاتام. فقط افروزا دئنن بیر دیقا بورا باخسین. آنام گلدی اوتوردو‌، من گئتدیم پست اوستونه. داما ساری:« هه بهروز نه دی»؟
شیطانجا گولومسونوب‌ منه گؤز ویردی. سونرا بارماغین سوکوت علامتینه دوداغی اوسته قویدو. سوسسسس…
باشیملا تأیید ائله‌دیم. آللاه بیلیر یئنه نه فیکیر باشیندا‌ کئچیردی.
بیرازدان تلویزیون جورلاندی. نی حیطدن بهروزون دالینجادا غزلین چیغیرتی سسی گلدی. تئزراق قاچدیق حیطه. آغا بهروز توشوب نردووانین قاباغینا؛ دیلی بیر قاریش ائشیکده؛ آغزی بوتون ‌کؤپوک، اسمه‌جه توتوب ‌ایراق صرع‌ مریضلری‌کیمین. غزلده دایی؛ دایی دئیه – دئیه باشین تومارلاییر، نئجه گؤز یاشین تؤکور.
– غزل قیز آغلاما گؤووم آخی. نه اولدو دایینا؟!
– دا. . ‌‌. دا. . . ‌دایی دامنان توشدو. ییخیلدی
گؤزونوز پیس گون گؤرمه‌سین. ننه‌م ال قاتدی اوزونه. سیللی قالمادی اوزونه دیزینه شاپاتتادی.
– دیلیم قورویایدی بالا. نئجه اؤز الیمله بالامی‌گودازا وئردیم؟! ننه‌ن اؤلسون؛ ‌ایندی‌ من گلین خانیما دده‌سی ائویندن قاییداندا نه دئییم؟! ننه‌ن اؤلسون دئمه‌دیم خونتورون سیمین چک. برق توتدو دای بالامی. دئنن آخی نئینیردین زهریمار تیلفیزیونو ؛‌ماللادان نوحه دن ؛ نوصیبتدن سونرا نه گؤستریرکی؟! ائویم ییخیلدی. چیراغیم‌کئچدی؛ بالام اؤلدو.
بو حینیده قونشولار حیطه تؤکولوشدولر:‌ای وای بلا به دور؛ نه اولوب زینت خانیم؟!
– نه اولاجاق خججه خاااام گ‍ؤرورسن دااا گول‌کیمین جاوانیم الیمدن گئتدی. یازیغ اولدوم. خانیملار هره‌سی بیر شئی تجویز ائلیردی. بیری چادراسیلا یئلپیلیردی. بیری اوزونه سو چیله‌ییردی.‌ کیشی‌لرده اورژانسا زنگ ویرماق اؤنریردیلر . . . .
بهروز دا‌کی یئرده آغناییب أسیردی. لاپبادان گؤز ووردوغو و ‌منه سوس علامتی یادیما توشدو. چیغیردیم:«دایانین؛ دایانین بو قودوغون یالانچی اداسیدیر. تلویزیون سیمینده برق یوخدو‌کی!!!
بهروز‌کی گؤردو نقشه‌سی بر آب اولوب ؛ گؤز آلتی ‌منه بیر آجیغلی باخدی.
بیر یاواشجالی تپیک سالدیم بؤیرونه:«دور جهنم اول. ییغیشدیر شبئهینی. قودوغ دئمیرسن آناجان سکته ووردو بو ناتاراز قلبیله؟! نه وده بو شیطانلیغدان ال چکه جکسن؟!
آنام ساکیت اولوب تعجوبله‌ منه باخدی:«یانی یالاندان ائلیر؟!
– بلی آننی‌سینین بیردانه‌سی یالاننان ائلیر، به نمنه؟!
بهروز شرمنده‌ ایاغا قالخدی.
قونشولاردان عوذور دیله‌دیم:«سن آللاه گوذشت ائله‌یین یئنه بونون اوشاقلیغی توتوب. بویورون ائوه چایدان؛‌ میوه‌دن. . .
کیشی، زنن شماتتله بهروزا باخیب ائله باشلارین توولادیلار، قاپیدان چیخدیلار؛ ‌من اولسایدیم یئره گیره‌ردیم واللاهی.
دئدیم: هئچ اؤلوب أریدین؟! داها سن ائو ائشیک صاحابیسان، بو‌ ایشلردن ال گؤتور.
نی‌ایندی آناجانین نؤبتیدی. ال ائله‌دی پیلله‌نین بؤیرونده‌کی یون چوبوغونا؛ بهروز‌هاوانی پس گؤروب جلد پیشیک‌ کیمین‌ دیرماشدی یئکه گیلاس آغاجیمیزا. آنادا آشاغیدان هئی یامانلاییر. دای یامانلاری یازمیرام چونکو آبا بو جور ‌مواقع ده عفت‌کلامین‌ کامیلن الدن وئریری په عجب غریبه ‌منظره اولموشدو. بهروز او گون خانیمیسی و آااجان ائوه گلینجه آغاجدان توشمه‌دی آبانین قورخوسوندان. اونلارلادا ائله هئی ‌ماجرانی دئییب آخشاماجا گولوشدیک. هر حالدا ساغولسون داااا.‌منه ده بیر خاطیره‌لی آدینا و بیر ساتیرا سوژه‌سی یاراتدی بهروز. هله‌لیک.