hasan ildirim
حبيب فرشبافين شاه دؤورونده يازديغي شعرلرينه باخيش
حسن ایلدیریم

قیرخینجی ايللرده اجتماعي حياتيميزدا باش وئره‌ن حادیثه‌لر ادبي- اجتماعي حياتيميزدا بؤیوک ده‌یيشيك‌ليك‌لره سبب اولدو. بو حادیثه‌لردن ان تاثيرليسي و ده‌یرليسي، ضيالي گنجلريميزين بير گروپونون دانشسراني قورتاريب و موعللیم وظيفه‌سينده آذربايجان كندلرينده ياييلماسي‌ايدي. بو ضيالي و اینسان‌پرور گنج‌لر يوردوموزون ان اوجقار كندلرينه اوز قویوب، كندچي بالالارينا يئني اصولدا مكتب قوروب و اونلارا يازيب اوخوماقلا برابر، نئجه ياشاماغي اؤيرتمه‌يه باشلاديلار. بو فداكار گنج‌لر تكجه موعللیم‌ليك وظيفه‌سيله قناعتلنمه‌ييب، بلكه كندلي‌لرين دردلرينه سئوينج‌لرينه اورتاق اولاراق، اونلارين گونده‌ليك ايشلرينده ده اشتراك ائديب و او ساده و پاك قلبلي اینسانلارين اعتباريني قازانا  بيلديلر.
بو موعللیم‌لرین چوخو موعللیم‌ليكدن باشقا ادبياتلادا مشغول اولوردولار. اونلار بير ياراديجي كيمي یئنی مضمونلو، یئنی تيپلي ادبياتي كندلرده تبليغ ائده‌رك، كندلي‌لرین ديلينده‌كي تميزليیي، آخارليليغي، ایفاده طرزيني اؤز اثرلرينده قورويوب ساخلايا بيلديلر و كند حياتيندان تاثيرلي لوحه‌لر يارادا بيلديلر و نهايت ادبياتيميزدا یئنی بير ادبي نسلين يارانماسي‌نين تمل داشيني قويدولار.
يوخاريدا قيد ائتديیيم نسلين گؤرکملی نماينده‌لري‌نين بيري ده “حبيب فرشباف” ايدي. حبيب اؤز تحصيليني قورتاران كيمي كؤنونللو اولاراق قاراداغ كندلرينده موعللیم‌ليیه باشلادي. او قاراداغلي‌لارا پاك محبت، تميز اوره‌ك و شعرله قانادلانان خيال آپاردي. او ديارين طبيعي گوزلليك‌لري و زحمت آداملارينين گذراني و معنوي عالمي، شاعرين  خيالي‌نين اويلاغينا چئوريلدي. شاعر موعللیم اؤز ياراديجيليغي‌نین اساس غايه‌سيني كوتله‌لرین حياتي‌نين ترننومونه حصر ائتدي:
“شخصي دویغولاردان آسيلي هونر
قارني آج يوخسولون نه‌يينه گره‌ک؟”
شاعر خالقين دردلريني اؤز دردلري كيمي ياشاديغيندان، يوخاريداكي مصراعلاري قلمه آلير و فردي و اينتيم حیس‌لردن اوزاقلاشيب و صنعتيني خالقين آزادلیغی و سعادتي اوغرونا حصر ائدير.
حبيب‌ين ايلك قلم تجروبه‌لري كند حياتيندان آلينميش تاثراتین محصولودور. آنجاق بو تجروبه‌لر گنج بير شاعرين اولدوغونا باخماياراق، سانكي سوموك سينديرميش ساچ- ساققال آغارتميش مودروك بير قوجانين، نيك‌بين بير اجتماعي متفكرين دوشونجه‌لريندن يارانميش، فيكیر آبیده‌لري‌ديرلر. شاعرین موضوعلاري مختلف‌دير، الوان‌دير. او بزكدن توتموش چؤره‌یه كيمي ياشاييشین وسائط‌لريندن، قايغيلي چوباندان توتموش فداكار مدرسه شاگیردينه كيمي اجتماعي حياتين بوتون ساحه‌لرینه نظر سالميش و اونلاردان پوئتيك نتيجه‌لر چيخارميشدير.
گؤرون ساري بوغدا سونبولو نئجه عمومي‌لشديريب و اونو كند حياتي‌نين منبعي و سیمبولو كيمي قلمه آلميشدير:
يوخ! سونبول دئييل بو، چؤره‌ك‌دير، ات‌دير
جرمه ده، روشوت ده، ساواد دا بودور
قند- چاي‌دير، پالتاردير، ايل زوماري‌دير
حيات منبعي‌دير بوتون آرزودور.
بو كيچك پارچادا شاعرين خالقين ياشاييشينا، معنوي عالمينه ياخين اولدوغو آيدين، آچيق صورتده گؤزوموزون اؤنونده دايانير . مثال اولاراق:
خوش گونلرده قيپلاناركن
ياخالارا دوزولورلر.
دار گونلرده سؤكولوركن
زاريلدايار قيپلي پوللار
خوش گونلرين سئوينجي، فرحي، دار گونلرين آغريسي، عذاب لاري، كند قاديني‌نين عادي بزه‌یينده گؤر نئجه جانلانا بيلير، پوئتيك‌لشه بيلير. بير قيپلي قارا پولون سيماسيندا اينجه و ظريف جيزگي‌لر يارانميش، گئنيش بيرحيات تابلوسو يارانير. حبيب ياراديجيليغينا خاص اولان بير سيرا اورژينال صورتلر، ادبياتيميزي رنگينلشديرميشدير. اونون ياراتديغي«زينب‌بئیيم»، «چوبان»، «تامام»، «ميرزه»، «باغيرين گليني»، عصريميزين كوراوغلوسو«غفور» و «سليمان»كيمي یئنی فيكیرلي جسور، فداكار، بديعي صورتلردير.
شاعر موعللیمين شاگیردي «سليمان»، اونون اثري‌نين نجيب، سخاوتلي، تميز اوره‌كلي قايغيلي قهرمانينا چئوريلنده، دويورسان و دوشونورسن و فداكار موعللیم‌لريميزين تربيه ائتديگي ائولادلارلا فخر ائديرسن:
هر گون درس‌دن سونرا چؤله گئدنده
آنام دستمالينا اوچ چؤره‌ك قويور
منسه چؤره‌ك‌لرین ايكيسين هر گون
جمشيدين ائوينه آتيرام، بو دور.
حبيب‌ين ترننوم ائتديیي زحمت آداملاري تكجه كند كوتله‌لري ايله محدودلاشمير، بلكه بوتون اؤلكه‌نين زحمت آداملاري، ضيالي‌لاري، موباریز اینسانلاري شاعر صنعتينده جانلانير، معنوي زنگين‌ليك، ‌وطنپرورليك، ‌هومانيزمين پوئتيك ماياسي‌نين بديعي ايفاده‌لر واسطه‌سيله شعر فورماسيندا شاعرين قلميندن سوزولور. اینسان‌پرور شاعري، خلقين آغير گذراني ،چتين و دؤزولمز ياشاييشی دريندن سارسيديب و قلبيني اينجيديرسه ده، بو قورولوشون عليهينه  قاوزانميش موباریزه‌نين قهرمانلاري‌نين ايگيدليیي و موباریزه عزمي اوندا نيك‌بين احوال – روحيه يارادير. “دوشونجه‌نين مكاني” شعرينده شاه ايشگنجه‌گاه‌لارينين دهشتلي فضاسي  و موباریزلرين عقله سيخماز ايشكنجه‌لر قارشيسيندا دوروشو، دؤزومونو هئيكل‌لشديرير. دوشونجه‌ني قولدا، ديلده آختاران جلادلار بو اينامين، اعتقادين قارشيسيندا عاجیزلشير. آخي دوشونجه، يئنيلمز قهرمانلارين قانلارينا، جانلارينا هوپموش و اونلارين وارليقلارينا چئوريلميشدير. ديري‌ليك‌لري خالقين موباریزه يوللاريني ايشيقلانديرير، ‌اؤلوم‌لري ايسه گله‌جه‌یين شفقلرينه دوغرو گئده‌ن كاروانين بايراغينا چئوريلير:
كؤرپه قوزو كيمي، اتي پاپيشدي ساجا
يئنه بير قان لکه‌سي آرتيردي قيزيل تاجا
يئنه بير حق عاشیقي، بير عشق اودونا ياندي
نسيمي تك داياندي
دوشونجه‌نين قوخوسو ماحاللارا ياييلدي
ائللر بوتون آييلدي.
حبيب ائله منطقه‌ده موعللیم‌ليك ائتميشدير كي، اوردا طبيعي گؤزلليك‌لر شیفاهي ادبياتيميزين، عاشيق صنعتيميزين چيچكلي يوردو كيمي شؤهرتلنميش بير ديار اولموشدور. ياماجلاري جئيران- جويورلو، دوزلري كؤزلو، بولاقلاري سئوگي نغمه‌لي، داغلاري عظمتلي، ائل- اوبالاري سازلي- سؤزلو، قوجالارينين، جاوانلارينين اوره‌یي قوشمالي، باياتيلي، آق ساققال‌لارينين، آغ بيرچكلي‌لرينين سينه‌لري حیكمتلي سؤزلر خزينه‌سي اولان بو ديار، شاعرين اوره‌یينجه اولموشدور.
اونون اوره‌یي بو گؤزلليك‌لر بئشيیينده نازلانير و ياراتديغي نغمه‌لرده هر بير گؤزلليك اؤز ترواتي ايله نغمه‌لنير و اوره‌كلري اوخشايير:
داغلار بولود ده‌لن، دره‌لر درين
نغمه‌لي بولاقلار جوشور سپ – سرين
حئيران اول حوسنونه ياشيل چؤللرين
مئشه‌لردن ایلهام آل قاراداغدا.

«اوشتيبين» كندينه دوشسه گوذارين
يئی قارا انجيرين ،‌گيلووشا نارين
بو يئرده نباتي سئودي اؤز يارين
ياماجلار اؤرتنده شال قاراداغدا.

«جوان حسين» دؤنوب وطنه باخدي
اوچ قارداش داغلاري گؤيلره قالخدي
«غربتي» چاغلادي، يانديريب ياخدي
بولبوللر اولدولار لال قاراداغدا.
شیفاهی ادبياتيميزين بيللور چشمه‌لريندن سو ايچن حبيب ياراديجيليغي، خلقي‌ليك، صميمي‌ليك و طبيعي‌ليك‌له آشيلانميشدير. شاعر دؤنه- دؤنه خالق ایفاده‌لريندن، بنزتمه‌لريندن استفاده ائدير؛ ائله بير مؤوقعه چاتير كي، گئتديكجه اونون اؤز ايفاده‌لري ده خلقي‌لشير، مودروكلشير و حئكمتلي سؤزلر سيراسينا داخیل اولا بيلير:
من  اؤز خطالاريما
تجروبه اولدو- دئيه،
خوش نيت‌له باخيرام.
تكجه بوندان قورخورام
بير دفعه‌ليك عؤمرومو
تجروبه‌ده باتيرام.
بو كيچيك پارچادا نه قده‌ر حيات تجروبه‌سي ياتيبدير. شاعرين قلميندن سوزوب گلن بو مودروک سؤزلر، اولو بابالاريميزين نصيحت‌آميز سؤزلريني خاطیرلاتميرمي؟ حبيب‌ين ياراديجيليغيندان بو قبیلدن اولان میصراعلاري، بندلري چوخ میثال گتيرمك اولار: میثال اوچون:
دئ نئجه تاني‌ييرسان ايكي اوزلو كيمسه‌ني؟
-ايكي دؤنه سئوديرير ايكي اوزلولر سني.
بير دؤنه تاپان زامان
بيرده كي ايتيرنده.
حبيب خالق عادت و عنعنه‌لرینه خور باخمير، اونلاري متفكر اینسان كيمي قيمتلنديرمه‌یي باجارير. شاعر بو عادتلری حياتين طبيعي آخاريلا علاقه ده گورور، و اینانیر کی بو عادت و عنعنه‌لر میللي ذووقون عضوي صورتده باغليليغينی گؤستریر. حبيب‌ين درين دوشونجه‌سي، ايتي باخيشی بونلاري ياخشي سئچه بيلیر. حبيب‌ين موضوع دايره‌سي او قده‌ر گئنيش‌دير كي، ‌اونون ياراديجيليغي‌نين تحليلي كيچيك بير مقاله‌یه سيغان دئييل، من دئيه بيله‌رم، تكجه اونون ايلك ياراديجيليغي دؤورونه عايد بعضي خصوصيت‌لردن سؤز آچا بيلديم و سون زامانلار ياراتديغي اثرلرينه توخونا بيلمه‌ديم.
حبيب‌ين ياراديجيليغي‌نين بؤیوک بير ساحه‌سي اوشاق ادبياتينا حصر اولونوب. حبيب اوشاقلارين اؤز دونياسينا اويغون شعرلر يازير. اوشاقلارين گؤزه‌ل اخلاقي سجيه‌لره يئيه‌لنمه‌سينه كؤمك ائدير. تضادلي دونياني اوشاقلارين باشا دوشدویو طرزده قلمه آلير.
من آرتيق سئويملي شاعریميزه، عزيز دوستوموزا اوزون عؤمور، جان ساغليغي و ياراديجي حيات آرزولاييرام.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4